Akademik Muxtar Kazımoğlu-İmanov BDU-nun Qazax filialında onlayn ustad dərsi keçib
AMEA Folklor İnstitutunun direktoru, akademik Muxtar Kazımoğlu İmanov Bakı Dövlət Universitetinin Qazax filialının Filologiya fakültəsinin müəllim və tələbə heyətinə onlayn "Folklor və yazılı ədəbiyyat" mövzusunda ustad dərsi keçib. Akademik Muxtar İmanov şifahi və yazılı ədəbiyyatda ifa kontekstindən, oxucu kontekstindən, bayatıların yas və toy mərasimində ifa tərzindən, aşıq sənətindən, dastanlardan, strukturu bəlli olan və olmayan xalq yaradıcılığından geniş məruzə edib. Subyekt və obyekt məsələlərindən, təhkiyədən, zaman və məkan məsələsində obrazlılıqdan da geniş danışıb.
Muxtar İmanovun bədii əsərlərin nağıllarla müqayisəsi zamanı İsa Hüseynovun (Muğanna) silsilə povestlərindən, "Tütək səsi" əsərindən, Səməd Vurğunun əsərlərindən, Yusif Səmədoğlunun "Qətl günü" əsərlərinin poetikası kimi məsələlər barədə nəzəri fikirləri böyük maraqla qarşılanıb, geniş diskussiyaya səbəb olub. Üçüncü kurs Filologiya fakültəsinin tələbələri Aytac İbrahimlinin, Jalə Mirzəyevanın, Zeynəb Babayevanın suallarını da cavablandırıb.
Bakı Dövlər Universitetinin Qazax filialında bu cür dərslərin keçirilməsi tələbələrin təhsil aldığı sahə üzrə gələcəkdə peşəkar kadr kimi yetişməsində mühüm rol oynayır, həmçinin AMEA ilə ali təhsil müəssisələri arasında elmi əməkdaşlığın genişləndirilməsi məqsədini daşıyır. |