Azərbaycan Milli Elmlər Akademiyası Folklor İnstitutunda həyata keçirilən layihələrin tərkib hissəsi kimi Güney Azərbaycan folklor örnəklərinin növbəti seriyası işıq üzü görmüşdür. Bu dəfə oxuculara təqdim olunan nümunələr IX və X cildlərdə toplanmışdır. Ənənəvi olaraq layihənin rəhbəri akademik Muxtar Kazımoğlu, tərtibçi dosent Mətanət Maşallahqızıdır.
IX cildə Güney Azərbaycanımızın müxtəlif bölgələrindən toplanmış folklor örnəkləri daxil edilmişdir. Bu sırada ilk olaraq uşaq folkloru nümunələrinə yer verilmişdir. Nazlamalar, laylalar, müxtəlif uşaq şeirləri, daha sonra atalar sözləri və məsəllər, bayatılar, sayalar, deyimlər, alqış və qarğışlar, xalq mahnıları, nağıllar, lətifələr və s. toplandığı kitabda bu vaxtadək el arasında mövcud olan və zaman-zaman toplanaraq oxucuya təqdim olunan nümunələrin fərqli versiyalarının təqdimatına xüsusi diqqət yetirilmişdir. Güney Azərbaycanda həyata keçirilən mərasimlər, inanclar, mifoloji mətnlər, əfsanə və rəvayətlər, peyğəmbərlər, ocaqlar, dini şəxsiyyətlər və s. haqqında toplanan folklor örnəkləri də oxuculara Güney Azərbaycanın zəngin ağız ədəbiyyatı xəzinəsi ilə ətraflı tanış olmaq imkanı verəcəkdir. Folklor materiallarını Mətanət Maşallahqızı, Qiymət Məhərrəmli, Səbuhi Bədəlov transliterasiya etmişlər. Kitabın redaktoru Ramiz Kərəmdir.

“Güney Azərbaycan folkloru” seriyasından oxuculara təqdim olunan növbəti X cilddə isə Güney Azərbaycanın zəngin şifahi xalq yaradıcılığına aid dastan nümunələri toplanmışdır. X cild əsasən, Təbriz-Qaradağ, Zəncan, Şahsevən və s. bölgələrə mənsub aşıqların repertuarından götürülmüş dastanlara həsr olunmuşdur. Kitabda xalq içərisində geniş yayılmış “Şah İsmayıl”, “Qurbani”, “Nəcəf”, “Bəy Aslan və Hüsnüpəri” dastanlarına yer verilmişdir. Əsasən, dinləmə materiallarından yazıya alınmış həmin dastanları oxucuya təqdim etməklə, xalq içərisində sevilə-sevilə oxunub, el şənliklərini bəzəyən
bu dastanların aşıq dilindəki bütün üstün cəhətlərinin ‒ dialekt, şivə xüsusiyyətlərinin qorunması, orijinal el deyimləri ilə zənginliyi və s. cəhətlər nəzərə alınmışdır.
Geniş oxucu kütləsinin və folklor araşdırmaçılarının diqqətinə təqdim olunan bu kitabın da layihə rəhbəri Akademik Muxtar Kazımoğlu-İmanov, tərtibçi Mətanət Maşallahqızı-Abbasova, redaktoru Ləman Vaqifqızı, səsli faylların üzünü köçürən isə Lalə Bədirovadır.

Qiymət Məhərrəmli