«Gücümüz birliyimizdədir» mövzusunda elmi konfrans keçirilmişdir

15 dekabr 2017-ci il tarixdə İsmayıllı şəhərində AMEA Folklor İnstitutu və İsmayıllı Rayon İcra Hakimiyyətinin təşkilatçılığı ilə «Gücümüz birliyimizdədir» mövzusunda elmi konfrans və «Azsaylı xalqların folkloru » kitabının İsmayıllı rayonunda yaşayan azsaylı xalqlara (lahıc, ləzgi, hapıt və molokan) həsr olunmuş II cildinin təqdimatı keçirilmişdir. Tədbirdə İsmayıllı Rayon İcra Hakimiyyətinin nümayəndələri, AMEA Folklor İnstitutunun əməkdaşları, o cümlədən İnstitutun direktoru, akademik Muxtar İmanov, İsmayıllı rayonu ziyalıları, azsaylı xalqların kompakt şəkildə yaşadıqları yaşayış məntəqələrin icra nümayəndələri və bələdiyyə sədrləri, Lahıc və İvanovkanın yerli folklor qrupları iştirak etmişlər. Tədbiri giriş sözü ilə İsmayıllı RİH başçısının müavini S.Əhmədova açmış, sonra AMEA-nin Folklor İnstitutunun direktoru, akademik M.İmanov regional folkorşünaslığın perspektivləri və problemlərindən bəhs edən geniş məruzə ilə çıxış etmişdir. «Azsaylı xalqların folkloru» (II cild) kitabının tərtibçiləri Atəş Əhmədli və Dadaş Əliyev kitabın məziyyətləri, elmi əhəmiyyəti, topladıqları mətnlərin informatorları və s. barədə məlumat vermişlər. Tədbirdə alimlərlə yanaşı milli azlıqların nümayəndələrinin də məruzə və çıxışları dinlənilmişdir. Konfransın sonunda yerli folklor ansamblları maraqlı konsert proqramı ilə çıxış etmişlər.