"Bir dünya, min millət" mövzusunda seminar keçirilib

Noyabrın 2-də AMEA Folkor İnstitutu və Göyçay Rayon İcra Hakimiyyətinin birgə təşkilatçılığı ilə Göyçay şəhərində "Bir dünya, min millət" mövzusunda elmi seminar keçirilib. Seminarın məqsədi Azərbaycan narının tanıtımı, onun Azərbaycan folklorundakı mifoloji semantikasının öyrənilməsi və etnoqra¬fiyamızda yeri kimi məsələləri müzakirə etmək olub.

Tədbiri giriş sözüylə Göyçay Rayon İcra Hakimiyyəti başçısının müavini Zivər Zeynalova açaraq iştirakçıları salamlayıb, Nar festivalı ərəfəsində keçirilən seminarın elmi əhəmiyyətinə toxunub. Sonra İctimai Televiziyanın “Carçıfilm” Yaradıcılıq Birliyinin ərsəyə gətirdiyi "Nar - bir dünya" sənədli filminin nümayişi olub.

AMEA Folkor İnstitutunun direktoru, akademik Muxtar Kazımoğlu-İmanov "Azərbaycan folklorunda narın mifoloji semantikası" mövzusunda məruzə edib. Məruzədə bildirilib ki, Azərbaycan folkorunun bir çox janrlarında - nağılarımızda, dastanlarımızda, bayatılarımızda, aşıq sənətimizdə, el nəğmələrimizdə və s. narın təsvirinə geniş yer verilir. Xalq ədəbiyyatında narla bağlı ayrı-ayrı süjetlər, motivlər, obrazlar var. Qurani-Kərimdə bir neçə meyvənin, o cümlədən narın adı çəkilir. Nar mifoloji rəmz kimi məhəbbət, güc, məhsuldarlığı ifadə edir.

Seminarda Göyçay rayon Təhsil Şöbəsinin metodisti Əkbər Əliyev "Klassik poeziyada nara müraciət", AMEA Folkor İnstitutunun elmi katibi, fil.ü.f.d. Elçin Abbasov "Azərbaycan nağıllarında narın simvolikası", AMEA Folkor İnstitutunun aparıcı elmi işçisi, fil.ü.f.d. Atəş Əhmədli "Bayatılarda nar və onun semantik çalarları", Göyçay Rayon Mərkəzi Xəstəxanasının baş həkiminin müavini Ləman Hacıyeva "Nar təbabətdə", Göyçay Şəhər Mərkəzi Məscidi dini icmasının sədri Müşfiq Əskərov "Qurani-Kərimdə nar", Göyçar Rayon Bitkiçilik Sektorunun baş məsləhətçisi Famil Nəbiyev "Narçılığın iqtisadi əhəmiyyəti" mövzularında çıxışlar ediblər.
Bununla da seminar öz işini başa çatdırıb.