Türkiyənin Ankara şəhərində nəşr edilən “Türk dili” dərgisi ölkənin ən nüfuzlu jurnallarından biridir. Jurnal yalnız Türkiyədə deyil, dünyanın 50-dan çox ölkəsində yayılır. Bildirək ki, sovet dövründə xarici ölkələrin nəşrlərinin alınması məhdudlaşdırıldığı bir zamanda “Türk dili” jurnalı Azərbaycanın əsas kitabxanalarına verilirdi.
“Türk dili” adlı jurnalın nəşrinə hələ Birinci Türk Dili Qurultayının 1932-ci ilin 5 oktyabr tarixli toplantısında qərar verilmişdi. Jurnal o vaxtdan arada müxtəlif problemlər və fasilələr olsa da, nəşr edilir.
Jurnalın son sayında (2017-ci il, mart) AMEA Folklor İnstitutu ilə sıx əməkdaşlıq edən Nail Tanın “Kitaplık” rubrikası altında “Eski Fakat Yeni: 1927 Tarihli Bir Azerbaycan Edebiyat Tarihi” məqaləsi oxucuların mühakiməsinə verilib. Yazıda AMEA Folklor İnstitutu tərəfindən 2016-cı ildə “Elm və təhsil” məşriyyatında çap olunmuş “Əmin Abid. Azərbaycan türklərinin ədəbiyyatı tarihi” kitabının elmi dəyərindən söz açılıb, geniş biblioqrafiya verlib.
Qeyd edək ki, AMEA Folklor İnstitutunun direktoru, AMEA-nın müxbir üzvü Muxtar Kazımoğlu-İmanovun layihə rəhbəri olduğu kitabın elmi redaktoru filologiya üzrə fəlsəfə doktoru Rza Xəlilov, nəşrə hazırlayanlar və ön sözün müəllifləri professor Bədirxan Əhmədov və Əli Şamildir.
Nail Tanın məqaləsini təqdim edirik. (OXU)