Azərbaycan Milli Elmlər Akademiyasının (AMEA) Folklor İnstitutu əsasən folklor nümunələrinin toplanılması, tərtibi və araşdırılması ilə məşğul olur.

   Bununla yanaşı, Azərbaycan folklor nümunələrinin tanıdılması və təbliği də institutun məqsəd və vəzifələri sırasına daxildir. Bu məqsədlə institutun nəzdində fəaliyyət göstərən Folklor Studiyasının xətti ilə Azərbaycan xalq musiqisinin ayrı-ayrı sahələrini əks etdirən xüsusi albom-disklər buraxılır. Bu materiallar institutda folklor fondunun əsaslı şəkildə qurulması üçün çox vacibdir. Studiyanın rəhbəri, musiqi sahəsində 20 illik təcrübəsi olan Mahir İbrahimov AZƏRTAC-a müsahibəsində bildirib ki, AMEA-nın prezidenti, akademik Akif Əlizadənin təşəbbüsü ilə 2016-cı ilin iyulunda studiyada bərpa-təmir işlərinə başlanılıb, studiyada müəyyən avadanlıqlar quraşdırılıb. Folklor Studiyası görülən işlər nəticəsində müasir görkəm alıb. İstər iki ton zalı, istər montaj otağı, istərsə də məşq-çəkiliş (xromokey) zalı ən son avadanlıqlarla təchiz olunub. Studiyanın rejissoru Qasım Nağıyev, operatoru Əlisəftər Məmmədov, səs rejissoru İffət Əsgərov, səs texniki isə Ramin Abdullayevdir.

   Studiyanın qısa müddətdə gördüyü işlərdən danışan M.İbrahimov Folklor İnstitutunun nəzdində fəaliyyət göstərən “İrs” ansamblının 20 mahnıdan ibarət iki albomunun (audio CD) buraxılmasını studiyanın gördüyü son işlərdən biri hesab edir. Onun sözlərinə görə, bunun ardınca AMEA-nın “Keçmişimizi unutmayaq!” layihəsi çərçivəsində “Kitabi-Dədə Qorqud” və “Koroğlu” dastanlarından seçmələr əsasında albom buraxılıb. “Quba yəhudiləri” etnoqrafik sənədli filmi (33 dəqiqəlik) də studiyanın gördüyü uğurlu işlərdəndir. Burada Azərbaycanın qədim milli rəqslərindən ibarət rəqs proqramı da hazırlanıb. Hazırda “İrs” ansamblı ilə yeni layihə üzərində işlər gedir.

   Gələcək planlardan söz açan M.İbrahimov bildirib ki, studiyada iki hissədən ibarət layihə çərçivəsində Azərbaycanda yaşayan azsaylı xalqların tarixi və adət-ənənələri haqqında, o cümlədən xalqımızın həyat tərzinə çevrilən multikultural dəyərlərlə bağlı silsilə filmlər çəkiləcək. Bundan əlavə, “İrs” ansamblının repertuarı ilə regionlarda konsertlər təşkil etmək nəzərdə tutulub.