Əməkdaşlarımızın kitabları
![](images/8.1.2016.jpg)
“Azərbaycan folklorşünasları (1920-1950)”
Fil.ü. e.d., prof. Cəlal Qasımovun “Azərbaycan folklorşünasları (1920-1950)” (Bakı, Elm, 2015, 456 səh) kitabı işıq üzü görüb.
Tədqiqatda 1920-1950-ci illərin elmi mühiti, xüsusən də Azərbaycan folklorşünaslarının repressiv və totalitar rejim şəraitində göstərdiyi fədakarlıqlar faktlar və sənədlər əsasında öyrənilib. Kitabda ayrı-ayrı folklorşünaslarla bağlı ilk dəfə aşkara çıxarılan arxiv materialları Azərbaycan folklorşünaslıq elminin tarixini, onun diqqətdən kənarda qalmış bir çox məsələlərini öyrənmək üçün böyük əhəmiyyət kəsb edir.
Əsər bu sahədə çalışan mütəxəssislər və geniş oxucu kütləsi üçün nəzərdə tutulub. Kitabın elmi redaktoru AMEA Folklor İnstitutunun direktoru, AMEA-nın müxbir üzvü Muxtar Kazımoğlu-İmanov, rəyçilər fil.ü. e.d., prof. Kamran Əliyev, fil.ü. e.d. Seyfəddin Rzasoydur.
***
“Azərbaycan folklorunda şaman-qəhrəman arxetipi”
Fil.ü. e.d. Seyfəddin Rzasoyun “ Azərbaycan folklorunda şaman-qəhrəman arxetipi (“Əsli-Kərəm” və “Dədə Qorqud”)” (Bakı, Elm və Təhsil. 2015, 341 səh.) kitabı işıq üzü görüb. Kitabda Azərbaycan /Oğuz/ Türk etnokosmik düşüncəsinin əsas struktur modellərindən olan Şaman/Qəhrəman arxetipi “Əsli-Kərəm” və “Kitabi-Dədə Qorqud” dastanının ikinci boyu əsasında bərpa olunub. Təhlil istisnasız olaraq mətn informasiyası üzərində aparılıb, mətnin verdiyi ritual-mifoloji informasiya kosmoloji düşüncənin arxetip, formul və sxemlərini indiki səviyyəsində rekonstruksiya etməyə imkan verib. Şaman/Qəhrəman invariantının Qazan/Uruz/Kərəm... paradiqmaları əsasında buradakı bərpası və bunun tədqiqatda əldə olunan nəzəri-metodoloji təcrübəsi Oğuz-Türk mifologiyasının Azərbaycan folklor materiyası əsasında bərpası üçün geniş imkanlar açır .
Kitabın ekspert-rəyçisi prof. Ramazan Qafarlı, elmi redaktorları fil.ü.f.d. Hikmət Quliyev, fil.ü.f.d. Səfa Qarayev, rəyçilər dos. Şakir Albalıyev, fil.ü.f.d. Emin Ağayevdir.
|