Türkiyə Respublikasının Mədəniyyət və Turizm Nazirliyinin tərkibində olan İqtisadi İnkişaf və Sosial Araşdırmalar İnstitutu (İKSAD ) Türkiyə və bir çox xarici ölkələrdə (Ermənistan istisna olmaqla) böyük sosial və iqtisadi layihələr həyata keçirir. Bu elmi-mədəni təbbirlərdən biri də Türkiyədə və dünyada bir çox elm sahələrini birləşdirən Beynəlxalq konfranslardır.

İKSAD 2020-ci ildə Azərbaycanda ondan çox Beynəlxalq konfrans təşkil etmişdir. Bunlara Kitabi Dədə Qorquda, şair Bəxtiyar Vahabzadəyə və Novruz bayramına həsr olunmuş konfransları misal göstərə bilərik. Sözügedən konfrasların təşkilində və keçirilməsində AMEA Folklor İnstitutu da aktiv rol oynamışdır. Bütün bunları nəzərə alaraq göstərdikləri səmərəli fəaliyyətlərə görə İKSAD-ın “Yönetim Kurulunun” qərarına əsasən Folklor İnstitutunun direktoru, akademik Muxtar Kazımoğlu-İmanov və İnstitutun “Dədə Qorqud” şöbəsinin müdiri , professor Ramazan Qafarlı 2021-ci ilin İKSAD “Bilim Onur Ödülü” nə (ELM MÜKAFATI-na) layiq görülmüşdür.

Mükafatları 14 yanvar İKSAD-ın Azərbaycan üzrə baş təmsilçisi, Azərbaycan Dövlət Pedaqoji Universitetin əməkdaşı Əlvan Cəfərov Folklor İnstitunun binasında təqdim etmişdir. Təqdimat zamanı Türkiyənin İqtisadi İnkişafı və Sosial Araşdırmalar İnsitutunun rəhbəri Dr. Mustafa Latif Emek canlı bağlantı ilə mükafatçıları salamlamış və təbrik etmişdir. O, gələcəkdə də AMEA Folklor İnstitutu ilə Türkiyənin İqtisadi İnkişafı və Sosial Araşdırmalar İnsitutunun (İKSAD-ın) birgə əməkdaşlığının davamlı olacağına ümid bəslədiyini vurğulayıb.

Qeyd edək ki, Folklor İnstitutu və İKSAD-ın birgə əməkdaşlığı davam edir. Belə ki, Folklor İnstitutu və İKSAD-ın birgə əməkdaşlığı ilə 2021-ci ilin 18-21 mart tarixlərində füsünkar Qarabağımızda Böyük bir “Novruz konfransı” təşkil ediləcəkdir. Hazırda konfransa məqalə qəbulu davam edir.
Bundan əlavə sözügedən təşkilatlar cari ilin iyul, avqust və sentyabr aylarında “Nizami Gəncəvi 880”, “Dədə Qorqud”, “Bəxtiyar Vahabzadə” elecə də “Qarabağ Sosial və Bəşəri Elmlər konfrans”larını da təşkil etməyi planlaşdırmışdır.