“Azərbaycan narının multidissiplinar funksiyası” mövzusunda Beynəlxalq Elmi Konfransın materialları kitabı çapdan çıxıb
![](images/19.11.2020.jpg)
Azərbaycan Respublikası Prezidenti yanında Bilik Fondu, Göyçay Rayon İcra Hakimiyyəti və AMEA Folkor İnstitutunun birgə təşkilatçılığı ilə bu yaxınlarda “Azərbaycan narının multidissiplinar funksiyası” mövzusunda Beynəlxalq Elmi Konfransın materialları kitabı "Elm və təhsil" nəşriyyatında çapdan çıxıb. Kitabın layihə rəhbəri AMEA Folkor İnstitutunun direktoru, akademik Muxtar İmanov, tərtibçisi filologiya üzrə fəlsəfə doktoru Atəş Əhmədli, redaktoru isə filologiya üzrə fəlsəfə doktoru, dosent Əziz Ələkbərlidir. Kitabın ingilis dili üzrə məsul şəxsləri: filologiya üzrə fəlsəfə doktoru, dosent Vəfa İbrahim və filologiya üzrə fəlsəfə doktoru, dosent Sönməz Abbaslıdır. Konfrans materiallarının rus dilində məsul şəxsləri isə filologiya üzrə fəlsəfə doktoru, dosent Çiçək Əfəndiyeva və filologiya üzrə fəlsəfə doktoru Vüsal Səfiyevadır.
Məlum olduğu kimi, 29 noyabr 2018-ci ildə Göyçay şəhərində Azərbaycan Respublikası Prezidenti yanında Bilik Fondu, Göyçay Rayon İcra Hakimiyyəti və AMEA Folkor İnstitutunun birgə təşkilatçılığı ilə “Azərbaycan narının multidis-siplinar funksiyası” mövzusunda Beynəlxalq Elmi Konfrans keçirilmişdir. Kitab həmin Beynəlxalq Elmi Konfransın materialları əsasında tərtib edilmişdir. “Azər-baycan narının multidissiplinar funksiyası” mövzusunda Beynəlxalq Elmi Konfransın materialları kitabında bir çox maraqlı yazılar yer almışdır.
Beynəlxalq Elmi Konfransın materialları kitabı giriş sözü olaraq Göyçay Rayon İcra Hakimiyyətinin başçısı Mehdi Səlimzadənin “Birliyimizin rəmzi” məqaləsi ilə başlayır. Bundan sonra kitabda AMEA Folkor İnstitutunun direktoru, akademik Muxtar Kazımoğlu-İmanovun “Narın mifoloji semantikası”, Azərbaycan Respublikasının Prezidenti yanında Bilik Fondunun icraçı direktoru, pedaqogika üzrə fəlsəfə doktoru, dosent Oktay Səmədovun “Dənəciklər məcmusu bütövlüyün rəmzi kimi: nar-təbiət möcüzəsi”, Türkiyə Cumhuriyyətindən filologiya üzrə fəlsəfə doktoru, dosent Seyfəddin Altaylının “Türk mədəniyyətində nar”, Azərbaycan Respublikasının Prezidenti yanında Bilik Fondunun aparat rəhbəri, professor İsaxan Vəliyevin “Nar multidissiplinar kontekstdə”, professor Seyfəddin Rzasoyun “Gülarə Munisin “Nar dənəsi” hekayəsində kosmoloji arxetiplər”, filologiya üzrə fəlsəfə doktoru, dosent Ağaverdi Xəlilin və Akifə Xəlilovanın “Azərbaycan xalq mahnılarında nar motivi”, filologiya üzrə fəlsəfə doktoru Atəş Əhmədlinin “Bayatılarda nar:formal və semantik təzahürlənmələr”, filologiya üzrə fəlsəfə doktoru, dosent Atif İslamzadənin “Nar qızı” nağılının semantik araşdırması” və başqa maraqlı məqalələr yer alıb.