Oktyabrın 18-də Dövlət Müstəqilliyi Günü münasibətilə Azərbaycan Dillər Universitetinin filologiya fakültəsinin təşkilatçılığı ilə “Müstəqilliyimiz gələcəyimizdir” adlı onlayın konfras keçirilib.
Konfransı giriş sözü ilə Universitetin Azərbaycan ədəbiyyatı kafedrasının müdiri, AMEA Folklor İnsititutunun direktoru, akademik Muxtar İmanov açaraq, tədbir iştirakçılarını bu şanlı bayram – Azərbaycanın dövlət müstəqilliyinin 29-cu ildönümü münasibətilə təbrik edib. O, Azərbaycanın dövlət müstəqilliyini yenidən bərpa etmək yolunda xalqımızın verdiyi mücadilədən, müstəqilliyin ilk günündən qarşılaşdığımız erməni terrorunun acı nəticələrindən söz açıb. Akademik daha sonra Milli Məclisdə 1991-ci il oktyabrın 18-də “Dövlət Müstəqilliyi haqqında konstitusiya aktı”nın qəbul olunmasından danışıb və bildirib ki, erməni işğalçıları yenicə qazandığımız müstəqilliyi hər vasitə ilə sarsıtmaq, xalqımızın iradəsini qırmaq istəyirdilər. Həmin illərdə yenidən hakimiyyətə gələn Ulu Öndər Heydər Əliyev müstəqilliyimizin qorunması üçün mühüm işlər görüb. Akademik Heydər Əliyevin müstəqillik haqqında məşhur kəlamını xatırladıb: “Müstəqilliyi əldə etmək nə qədər çətindirsə, onu qoruyub saxlamaq da bir o qədər çətindir!”

Çıxışçı Ümummilli lider Heydər Əliyevin siyasi varisi, Prezident İlham Əliyevin Azərbaycanın inkişafı üçün geniş islahatlar apardığını və müdrik qərarları ilə xalqımıza xidmət etdiyini vurğulayıb. O, son günlər şanlı ordumuzun 30 il düşmən işğalında olan Vətən torpaqlarının azad ediıməsi yolunda göstərdiyi misilsiz şücaətindən söz açıb: “Bu gün rəşadətli Azərbaycan ordusu dünya miqyasında ən güclü ordulardan birinə çevrilib. Onun düşmənə endirdiyi öldürücü zərbələr müasir hərb elminin ən son uğurlarına əsaslanır. Təsadüfi deyil ki, inkişaf etmiş ölkələr də ordumuzun uğurlarını heyranlıqla izləyir və ondan öyrənməyi düşünürlər.”
M.İmanov müzəffər ordumuzun bu ardıcıl qələbələri ilə müstəqillik tariximizdə yeni səhifə açdığını konfrans iştirakçılarının diqqətinə çatdırıb. O, Ali Baş Komandanın rəhbərliyilə ordumuzun Azərbaycanın ərazi bütovlüyünü tam təmin edəcəyi günün uzaqda olmadığını bildirib.

Daha sonra konfransda Fransız dilinin fonetikası və qrammatikası kafedrasının müdiri, fil.f.d., prof. əvəzi Ülfət İbrahimin fransız dilində “Müstəqilliyə gedən yol və Qarabağ münaqişəsi” (“Le chemin menant à l'indépendance et le conflit autour de la région de Karabagh”), filologiya fakültəsinin IV kurs tələbəsi Səmra Novruzovanın ingilis dilində “Azərbaycanın əbədi müstəqilliyi” (“Eternal independence of Azerbaijan”), filologiya fakültəsi II kurs tələbəsi Sənan Cabbarlının ispan dilində “Müstəqilliyin 29-cu ildönümünün gətirdiyi sevinc” (“Vigésimo noveno aniversario de la independencia ha traído alegre”) və filologiya fakültəsi II kurs tələbəsi Elşən Hüseynlinin “Ölkəmizin qan bahasına qazandığı Müstəqilliyi!” adlı məruzələri dinlənilib.
Bundan başqa fakültənin dekanı, professor Şahin Xəlilli və virtual jurnalistika kafedrasının müdiri Nərgiz Qurbanlı mövzu ilə bağlı fikirlərini bildiriblər.
Akademik Muxtar İmanov məruzələri və səslənən fikirləri ümumiləşdirərək konfransı yekunlaşdırıb.