Oktyabrın 2-də AMEA Folklor İnstitutunda “Şanlı Azərbaycan ordusuna dəstək” aksiyası keçirilib. İlk öncə Azərbaycanın müstəqilliyi, ərazi bütövlüyü uğrunda canlarından keçmiş şəhidlərimizin əziz xatirəsi yad edilib. Sonra AMEA Folklor İnstitutunun direktoru, akademik Muxtar Kazımoğlu-İmanov çıxış edib və bildirib ki, Ermənistanın ölkəmizə qarşı törətdiyi mütəmadi hərbi təxribatlara layiqli cavab verən Azərbaycan Silahlı Qüvvələri işğal olunmuş torpaqların azad edilməsi üçün düşmən üzərinə əks-hücuma keçib. Ordumuz çox qürurverici və şanlı bir tarix yazır. Bu gün ölkəmizdə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında xalqla ordunun mənəvi birliyi mövcuddur. Azərbaycan xalqı haqq işi uğrunda vuruşan ordusuna tam güvənir və onunla qürur duyur.

Tədbirdə sonra İnstitutun Mifologiya şöbəsinin müdiri, fil.e.d., professor Seyfəddin Rzasoy, Dədə Qorqud şöbəsinin müdiri, fil.e.d., prof. Ramazan Qafarlı, Musiqi folkloru şöbəsinin müdiri, sən.e.d., prof. Nailə Rəhimbəyli, Cənubi Azərbaycan folkloru şöbəsinin müdiri, fil.e.d. Mətanət Abbasova, Təhsil şöbəsinin müdiri, fil.e.d. Nizami Məmmədov və başqaları çıxış edərək bir çox ölkələrdə ermənilərin mənfur əməllərinin qınaq obyektinə çevrildiyini, Azərbaycanın haqlı mövqeyinin isə dəstək¬ləndiyini diqqətə çatdırıblar. Çıxışçılar bunu ölkə rəhbərinin yürütdüyü uğurlu xarici siyasətin bariz nümunəsi kimi dəyərləndiriblər.
Bildirilib ki, AMEA Folklor İnstitutu əməkdaşları bütün imkanları ilə müzəffər ordumuza dəstək verməyə hazırdırlar.
İnstitut əməkdaşları maliyyə dəstəyi olaraq əmək haqlarının bir hissəsini Silahlı Qüvvələrə Yardım Fonduna köçürməyi qərara alıblar.