Fevralın 25-də AMEA Folklor İnstitutunda Xocalı faciəsinin 28-ci il dönümü ilə bağlı tədbir keçirilib. Öncə Xocalı soyqırımı qurbanlarının əziz xatirəsi bir dəqiqəlik sükutla yad edilib.
Tədbiri giriş sözü ilə AMEA Folklor İnstitutunun direktoru, akademik Muxtar Kazımoğlu-İmanov açıb, vurğulayıb ki, 1988-ci ildən başlamış Ermənistan-Azərbaycan, Dağlıq Qarabağ münaqişəsi dövründə ən müdhiş və faciəli, tarixdə analoqu çox az olan hadisələrdən biri Xocalıda baş vermiş soyqırımıdır. Belə ki, bir gecənin içində qədim Xocalı şəhəri yerlə-yeksan edilib. Şəhəri tərk etməyə məcbur olan əhali dağlara, meşələrə qaçıb. Hər tərəfdə silahlı ermənilər dinc əhalini güllələyib, onlara divan tutulub. Yüzlərlə insandan 56 nəfəri xüsusi qəddarlıqla və amansızlıqla qətlə yetirilib. Onlar diri-diri yandırılıb, başları kəsilib, üzlərinin dərisi soyulub, hətta körpə uşaqların gözləri çıxarılıb, hamilə qadınların qarnı süngü ilə yarılıb. Muxtar Kazımoğlu-İmanov bu soyqırımı hadisəsinin qiymətləndirilməsi, dünyaya tanıdılması istiqamətində hər bir kəsin öhdəsinə böyük vəzifə düşdüyünü bildirib.

Sonra İnstitutun Folklor studiyasının Xocalı faciəsi ilə bağlı hazırladığı video çarx izlənilib.
İclas iştirakçılarından “Mərasim Folkloru” şöbəsinin müdiri, filologiya üzrə fəlsəfə doktoru, dosent Ağaverdi Xəlil çıxış edərək bu soyqırımı törədənlərin hələ də cəzalandırılmadığını bildirib.
Tədbirdə “Cənubi Azərbaycan folkloru” şöbəsinin əməkdaşı, filologiya üzrə fəlsəfə doktoru Qiymət Məhərrəmli Xocalı faciəsini XX əsrin ən dəhşətli və ən qəddarcasına törədilmiş Xatın, Xirosima faciələri ilə bir sırada durduğunu bildirib. Sonda isə faciə ilə bağlı yazdığı “O gecə” şerini səsləndirib.

Fil.ü.f.d., dos., şair Şakir Albalıyev erməni vəhşiliyinin bütün üzünü tam çılpaqlığı düşmənin əsirliyində olarkən gördüyünü tədbir istirakçılarının nəzərinə çatdırıb.
Müğənni Aşur Adıgözəlov Vətən uğrunda canlarından keçən igid oğullarımızın yaddaşlardan silinməyən qəhrəmanlıqlarından söz açıb.
İclası yekunlaşdıran akademik Muxtar Kazımoğlu-İmanov bildirib ki, hər il Xocalı faciəsi mövzusunda silsilə tədbirlərin keçirilməsinin bir mənası şəhidlərimizi yad etməkdirsə, digər mənası özümüzü xalq olaraq tanımaq, yaxın-uzaq tarixə baş vurmaq, ibrət dərsi götürmək, düşmənlərimizin törətdiyi vəhşilikləri unutmamaq olduğunu vurğulayıb.