“Güney Azərbaycan folkloru. VIII cild” çapdan çıxmışdır
AMEA Folklor İnstitutu “Cənubi Azərbaycan folkloru” şöbəsi yarandığı 5 il ərzində Azərbaycan folklorşünaslığına öz layiqli töhfələrini verməkdə davam edir. Təqdirəlayiq haldır ki, o qədər də uzun olmayan bu müddət ərzində şöbə əməkdaşları tədqiqatçılıq baxımından xeyli gərəkli işlər görmüş, Güney Azərbaycanın zəngin folklor örnəklərini toplayıb yazıya köçürmək yolu ilə, eləcə də, əldə edilmiş çap materiallarını (fars əlifbası ilə) transliterasiya edərək, bu zəngin mənəviyyat xəzinəsini elmi ictimaiyyətin və geniş oxucu kütləsinin ixtiyarına vermişdir.
Bugünlərdə işıq üzü görən və sayca səkkizinci olan “Güney Azərbaycan folklor örnəkləri. VIII” (Bakı, “Elm və təhsil”, 2019 – 408 səh.) kitabı da bu baxımdan olduqca böyük əhəmiyyətə malikdir.
Adıçəkilən layihənin rəhbəri AMEA Folklor İnstitutunun direktoru, akademik Muxtar Kazımoğlu-İmanov, kitabın tərtibçisi “Cənubi Azərbaycan folkloru” şöbəsinin müdiri, f.ü.f.d., dosent Mətanət Maşallahqızı-Abbasova, redaktoru Lalə Bədirovadır. Mətnləri şöbənin əməkdaşları f.ü.f.d. Qiymət Məhərrəmli və Səbuhi Bədəlov transliterasiya etmişlər.
Güney Azərbaycan seriyasından təqdim olunan və haqqında bəhs etdiyimiz növbəti kitabda oxuculara ölkəmizin güneyində xalq arasında dildə-ağızda qorunub-saxlanan uşaq folkloru nümunələri – nazlamalar, laylalar, müxtəlif uşaq şeirləri, uşaq oyunları, yanıltmaclar, tapmaca, atalar sözü və məsəllər, inamlar və sınamalar, xalq təbabəti nümunələri, bayatılar, nağıllar, lətifələr, Təbriz sarımaları, toy adətləri və s. təqdim olunur. Sonda söyləyicilər haqqında verilən məlumat, lüğət və ədəbiyyat siyahısı da mühüm əhəmiyyət kəsb etməkdədir.
Kitabın folklor araşdırıcılarının və geniş oxucu kütləsinin böyük marağına səbəb olacağına inanırıq.
Qiymət Məhərrəmli, “Cənubi Azərbaycan folkloru”
şöbəsinin böyük elmi işçisi |