Konyalı professor Folklor İnstitutunda məruzə edib

Dekabrın 2-də AMEA Folklor İnstitutu Elmi Şurasının iclası keçirilib. İclasda Türkiyənin Ankara Hacı Baryam Vəli Universitetinin Türk Kültürü Açısından Hacı Bektaş Veli Araşdırma Mərzəzinin müdiri, professor, doktor Ahmet Taşğın “Türkistan'dan Balkanlara Horasan Er Meydanı Olarak Azerbaycan: Horasan İrfanı ve Temsilcilerinin Seyr ü Seferi” mövzusunda məruzəsi dinlənilib. O, məruzəsində türk xalqlarında irfan məsələsinə toxunub, irfan elminin özəlliklə Azərbaycanda dərin köklərə sahib olduğunu bildirib, ölkəmizi qədim mənəvi dəyərlər yurdu kimi qiymətləndirib. Alimin çıxışı dinləyicilər tərəfindən maraqla qarşılanıb, o, sualları cavablandırıb.
Folklor İnstitutunun direktoru Muxtar Kazımoğlu gələcəkdə belə tədbirlərin qarşılıqlı şəkildə davam etdirilməsinin gərəkliyini bildirib, qonağa xatirə hədiyyəsi təqdim edib.
Qeyd edək ki, Ərzurum kökənli olan Ahmet Taşğın 1965-ci ildə Konyada doğulub. Konya Selcuk Universitetinin ilahiyyat fakültəsini bitirib. Ələvilik, yezidilik, süryanilik mövzularında yayınlanan bir çox araşdırmaların müəllifidir. Adıçəkilən mövzularla əlaqədar olaraq Suriya, İraq və İranda təhqiqatlar aparıb.