Nizami Muradoğlunun “Qanlı daş” romanı təqdim edilib
Bakı Yunus Əmrə İnstitutunda Azərbaycan Milli Elmlər Akademiyasının (AMEA) Folklor İnstitutunun təhsil şöbəsinin müdiri, filologiya üzrə elmlər doktoru, yazıçı Nizami Muradoğlunun Türkiyənin Alanya şəhərində “Arslan Bayır – Baygenç Yayıncılık” nəşriyyatında çap olunmuş “Kanlı taş” (“Qanlı daş”) romanının təqdimatı keçirilib. Kitabı türkcəyə çevirən AMEA Folklor İnstitutunun Qadınlar Şurasının sədri, mifologiya şöbəsinin böyük elmi işçisi, filologiya üzrə fəlsəfə doktoru Məleykə Məmmədovadır.
Folklor İnstitutundan AZƏRTAC -a bildirilib ki, tədbiri Bakı Yunus Əmrə İnstitutunun direktoru Cihan Özdemir giriş sözü ilə açaraq kitabın əhəmiyyətindən danışıb.
Sonra N.Muradoğlu əsərin yaranması ilə bağlı məlumat verib. Qeyd edib ki, bu roman 2014-cü və 2016–cı illərdə Bakıda “Baba ocağı” adı ilə nəşr edilib. Əsərdə təsvir edilən hadisələr XX əsrin əvvəllərində Azərbaycanın Naxçıvan bölgəsində cərəyan edir. Naxçıvanda erməni təcavüzünü real boyalarla əks etdirən kitab tarixi roman janrının mükəmməl nümunələrindəndir.
Tədbirdə Bakı Dövlət Universitetinin kafedra müdiri, filologiya üzrə elmlər doktoru, professor Allahverdi Məmmədli, şair-publisist, fəlsəfə üzrə fəlsəfə doktoru, professor Əhməd Qəşəmoğlu, Hədəf STEM liseyinin təsisçi-direktoru, filologiya üzrə fəlsəfə doktoru Şəmil Sadiq, AMEA-nın Folklor İnstitutunun əməkdaşları - filologiya üzrə elmlər doktoru İslam Sadıq, filologiya üzrə fəlsəfə doktorları Məleykə Məmmədova, Atəş Əhmədli, Atif İslamzadə, Tahir Orucov və başqaları çıxış edərək roman haqqında fikirlərini bildirib, müəllifə yaradıcılıq uğurları arzulayıblar.
Sonda Nizami Muradoğlu tədbirin iştirakçılarına və Bakı Yunus Əmrə İnstitutunun kollektivinə təşəkkürünü bildirib.
|