“Qədim türk yurdu Naxçıvan” kitabının təqdimatı keçirilib

Azərbaycan Milli Elmlər Akademiyasının (AMEA) Mərkəzi Elmi Kitabxanasında AMEA-nın Folklor İnstitutunun təhsil şöbəsinin müdiri, filologiya elmləri doktoru Nizami Muradoğlunun “Qədim türk yurdu Naxçıvan” kitabının təqdimatı keçirilib.
Kitabın elmi redaktoru AMEA-nın Fəlsəfə İnstitutunun elmi işlər üzrə direktor müavini, fəlsəfə üzrə fəlsəfə doktoru Eynulla Mədətli tədbirdə çıxış edərək nəşrin elmi əhəmiyyəti haqqında məlumat verib.
Qeyd edilib ki, N.Muradoğlunun Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Araz” Ziyalılar İctimai Birliyinin “Naxçıvanda erməni cinayətlərinin izi və iddiaları” adlı layihəsi əsasında nəşr olunan kitabı tarixi faktları özündə əks etdirən məqalələr toplusudur. Burada ermənilərin Naxçıvan diyarına köçürülməsi, burada yerləşdikdən sonra yerli əhaliyə qarşı törətdikləri vəhşiliklər, qanlı müharibələr haqqında geniş məlumat verilir. Kitabın rəyçiləri Qafqazşünaslıq İnstitutunun əməkdaşı, tarix üzrə fəlsəfə doktoru Kamran İsmayılov və AMEA-nın Milli Azərbaycan Tarixi Muzeyinin Arxeologiya elmi fond şöbəsinin müdiri, tarix üzrə fəlsəfə doktoru Nasir Quluzadədir.