FOLKLOR İNSTİTUTUNDA GÖRÜŞ

İyulun 25-də İstanbul Kültür Universiteti Türk dili və Ədəbiyyat fakültəsinin müəllimi və doktorantı Aytən Namazova AMEA Folklor İnstitutunun qonağı olub. İnstitutun direktor müavini fil.ü.f.d., dos. Oruc Əliyev qonağı səmimi qarşılayıb və qurum haqqında xeyli məlumat verib. Gəlişinin əsas məqsədini açıqlayan Aytən Namazova bildirib ki, İstanbul Kültür Universiteti və Türk Dünyası Araşdırmalar Mərkəzi İstanbul şəhərində Türk Dünyası Muzeyini yaratmaq niyyətindədirlər. Bu məqsədlə ilkin olaraq Azərbaycan, Qaqauz, Noqay, Krım, eləcə də Altay türklərinin folkloru, etnoqrafiyasını əhatə edəcək kitab hazırlamaq nəzərdə tutulub. A.Namazova bildirib ki, hazırlanacaq kitabda Azərbaycanın qərb zonasının ⸺ Gəncə, Şəmkir, Qazax, Ağstafa, Tovuz bölgələrinin folkloru, etnoqrafiyası ilə bağlı materiallar və fotoların yer alması ona həvalə edilib və bu məqsədlə o, yaxın günlərdə adıçəkilən bölgələrə ezamiyyətə yola düşəcək. Görüşdə İnstitutun “Klassik folklor” şöbəsinin aparıcı elmi işçisi, fil.ü.f.d., dos. Sönməz Abbaslı da iştirak edib. Sonda qonağa İnstitutun həmin bölgələrlə bağlı nəşrləri (kitablar) təqdim olunub, lazımi tövsiyələr verilib.