Akademik Akif Əlizadə-85
Fevralın 25-də görkəmli alim və ictimai xadim, Əməkdar elm xadimi, Azərbaycan Dövlət mükafatı laureatı, “Şöhrət”, “Şərəf” və “İstiqlal” ordenli, Azərbaycan Milli Elmlər Akademiyasının prezidenti, akademik Akif Əlizadənin 85 yaşı tamam oldu.
Görkəmli geoloq-alim və bacarıqlı elm təşkilatçısı olan akademikin başlıca tədqiqat sahəsi geologiya və paleolontologiya olsa da, hərtərəfli biliyə malik olması, uzaqgörənliyi digər elmlərlə yanaşı, humanitar sahədə də sağlam elmi mühitin yaradılmasına səbəb olmuşdur. Müasir dövrdə elmin cəmiyyətə inteqrasiyası və gənc nəslin elmi potensialının düzgün istiqamətə yönəldilməsi, ümumiyyətlə, Azərbaycanda dünya standartlarına cavab verən və dövrün tələbinə çevrilən elmi hərəkatın yaradılması akademik Akif Əlizadənin çoxsaylı xidmətlərindəndir.
2003-cü ildə Ulu Öndər Heydər Əliyevin təşəbbüsü və müvafiq sərəncamı ilə yaradılmış, xalqımızın maddi-mənəvi mədəniyyətinin tədqiqi və təbliğini qarşısına əsas məqsəd qoymuş Folklor İnstitutu da akademik Akif Əlizadənin qayğı və himayəsini hər zaman hiss edir. Bu gün Folklor İnstitutunun əldə etdiyi bütün uğurlar milli köklərə bağlı olan və zəngin mənəvi dünyaya malik akademikin bu qayğısının və etimadının nəticəsidir.
Azərbaycan ziyalılığının etalonu sayılacaq mənəvi keyfiyyətlərə malik Akademiki yubileyi münasibətilə təbrik edir, ona Azərbaycan elminin çiçəklənməsi yolunda yeni-yeni nailiyyətlər arzu edir və möhkəm cansağlığı diləyirik!
Akademik Muxtar İmanov
25 fevral 2019
|