“Urmu Folkloru” kitabı işıq üzü görüb
AMEA Folklor İnstitutunda Güney Azərbaycan şöbəsi yaranandan sonra İran İslam Respublikasında yaşayan türklərdən toplanmış folklor nümunələrinin nəşrində bir canlanma əmələ gəldi. Az zamanda 8 kitab nəşr edildi, bir neçə kitab üzərində də iş gedir. Görülən işlər o taya da öz təsirini göstərib. Folklorumuzun toplanması və nəşrində bir gəlişmə hiss edilir.
Bu ilin ilk günlərində sevindirici bir xəbər aldıq. Urmiyalı araşdırıcı Məhəmmədrza İsmaylızadə topladığı folklore nümunələrini “Urmiya folklore” adı altında “Nəvide hikmət” nəşriyyatında çap etdirib. İran Mədəniyyət və İslami İrşad Nazirliyinin icazəsi ilə nəşr edilən kitaba mövsüm-mərasim folklorundan nümunələr, bayatılar, ata sözləri, oxşamalar, nazlamalar, kinayələr, lətifələr, tapmacalar, əfsanələr, rəvayətlər, nağıllar, dastanlar, aşıq şeirləri və s. daxil edilmişdir.
31 bölümdən ibarət olan kitab 820 səhifədir. Folklor mətinlərini bölgənin mənzərəli yerlərini, tarixi abidələrini, haqqında əfsanə və rəvayətlər olan yerlərin şəkilləri izləyir. |