AMEA Folklor İnstitutunun direktoru, akademik Muxtar İmanov yanvar ayının 16-da Türkiyənin “Uşaq və Gənclik Ədəbiyyatı Yazıçılar Birliyi”nin müdiri Bican Veysəl Yıldızı qəbul edib.

Görüşdə Folklor İnstitutunun “Folklor və yazılı ədəbiyyat” şöbəsinin aparıcı elmi işçisi, fil.ü.f.d., dos. Fidan Qasımova da iştirak edib.
“Uşaq və Gənclik Ədəbiyyatı Yazıçılar Birliyi” illərdir uşaqların təlimi, tərbiyəsi, uşaq folkloru, uşaq ədəbiyyatı ilə bağlı beynəlxalq tədbirlər həyata keçirir. Bunlar arasında beynəlxalq simpoziumlar xüsusi yer tutur.

Görüşdə hər il Türkiyənin İstanbul şəhərində keçirilən beynəlxalq simpoziumun növbəti ildə Bakı şəhərində keçirilməsi, uşaq folklorunun, ədəbiyyatının təbliği istiqamətində mühüm məsələlər müzakirə edilib. AMEA Folklor İnstitutu və “Uşaq və Gənclik Ədəbiyyatı Yazıçılar Birliyi” arasında elmi əməkdaşlığın əsası qoyulub. Hər iki tərəf ümumtürk miqyasında uşaq ədəbiyyatının toplanıb, tanıdılması istiqamətində birgə fəaliyyətin önəmini vurğulayıb.