28.11.2018-ci ildə AMEA Folklor İnstitutu Qadınlar Şurası "Qadın zorakılığına qarşı beynəlxalq mübarizə günü" ilə bağlı dəyirmi masa keçirib. Yığıncağa mövzu ilə bağlı Regional Gender Mərkəzi İctimai birliyinin sədri Şərqiyyə Dadaşova dəvət olunub. Dəyirmi masanı giriş sözü ilə açan Şuranın sədri fil.ü.f.d. Məleykə Məmmədova qeyd edib ki, bütün dünyada 1981-ci ildən 25 noyabr tarixi zorakılığa qarşı mübarizə günü kimi qeyd olunur. Zorakılıq tək qadınlara deyil, həm də ailələrə, uşaqlara və yaşlılara, bütün cəmiyyətə zərbə vurur. Məleykə Məmmədova statistik göstəricilər əsasında zorakılıq halları ilə bağlı da məlumat verib. Daha sonra söz Regional Gender Mərkəzi İctimai birliyinin sədri Şərqiyyə Dadaşovaya verilib. O, zorakılıq – gender zorakılığı, məişət zorakılığı, psixoloji zorakılıq, iqtisadi zorakılıq, cinsi zorakılıq barədə ətraflı məlumat verib. Şərqiyyə xanım çıxışının sonunda bütün qadınları zorakılığa qarşı biganə qalmamağa çağırıb. Yığıncaqda çıxış edən fil.ü.f.d. Qiymət Məhərrəmli qoyulan mövzu ilə bağlı efirlərin vacib rol oynadığını qeyd edərək vurğulayıb ki, hazırkı efirlərin vəziyyəti heç də qənaətbəxş deyil. Çox vaxt mövzu ilə bağlı mütəxəssislər deyil, uyğun olmayan insanlar cəmiyyətə dərs verməyə çalışırlar. Eyni zamanda fil. ü.f.d. Nigar Həsənova və digər iştirakçılar məsələ ilə bağlı fikirlərini bölüşüblər. Dəyirmi masada Folklor İnstitutu Qadınlar Şurasının üzvləri ilə yanaşı AMEA-nın Zoologiya İnstitutunun, Şərqşünaslıq İnstitutunun, Riyaziyyat və İnformatika İnstitutunun, Aşqarlar Kimyası İnstitutunun, Kataliz və Qeyri-üzvi Kimya İnstitutunun, Tarix Muzeyinin, eləcə də Folklor İnstitutunun xanım əməkdaşları iştirak ediblər. Sonda Şərqiyyə xanımla söhbət çay süfrəsi ətrafında davam edib.