Qadınlar Şurasının növbəti yığıncağı keçirilib

Bu gün ölkəmiz üçün əlamətdar bir tarixdə - 12 noyabr Konstitusiya günündə AMEA Folklor İnstitutunun Qadınlar Şurası növbəti yığıncağını keçirdi. İclası açan Şuranın sədri fil.ü.f.d. Məleykə Məmmədova ilk olaraq 23 ildir qeyd olunan bu tarixi gün münasibətilə Şura üzvlərini təbrik etdi. Daha sonra son aylarını yaşadığımız 2018-ci il və qarşılayacağımız 2019-cu il üçün görüləcək işlər barədə fikir mübadiləsi aparıldı. İclasda bu ilin sonunadək şəhid - Milli Qəhrəman Çingiz Qurbanovun anasını ziyarət təklifi Şura üzvləri tərəfindən təxirəsalınmaz işlərdən biri kimi diqqətə alındı. Eyni zamanda 25 noyabr - Qadın Zorakılığına Qarşı Beynəlxalq Mübarizə Günü ilə bağlı dəyirmi masa keçirilməsi qərara alındı. Alim - şairə Qiymət Məhərrəmli ilə görüşün isə dekabr ayında təşkili nəzərdə tutuldu. Şura üzvləri sonda qarşıdan gələn 2019-cu ildə "Qadın yazıçılarımız və folklor" mövzusunda elmi - praktiki konfrans təşkil etməyi zəruri hesab etdilər.