“Dastan gecələri” layihəsinin ilk tədbiri həyata keçirilib
Aprelin 18-də Beynəlxalq Muğam Mərkəzində “Dastan gecələri” adlı möhtəşəm layihənin ilk tədbiri həyata keçirilib. Beynəlxalq Muğam Mərkəzinin və Azərbaycan Milli Elmlər Akademiyası Folklor İnstitutunun birgə təşkilatçılığı ilə gercəkləşən tədbirin açılışında Mərkəzin direktoru, Xalq artisti Murad Hüseynov və Folklor İnstitutunun direktoru, akademik Muxtar İmanov çıxış ediblər. Xalq artisti Murad Hüseynov bu layihənin diqqətəlayiq olduğunu, bundan sonra da belə layihələrə daha geniş yer veriləcəyini bildirib.
AMEA-nın Folklor İnstitutunun direktoru, akademik Muxtar İmanov çıxış edərək aşıq sənətinin təbliği baxımından layihənin əhəmiyyətindən danışıb. Bildirib ki, aşıq sənəti Azərbaycan xalq yaradıcılığının qədim tarixi köklərə malik özünəməxsus hadisəsidir. Bu sənət müxtəlif mərhələlərdən keçib, xalqımızın bir çox qeyri-maddi mədəni dəyərlərini özündə cəmləşdirib. Azərbaycan aşıq sənəti 2009-cu ildə UNESCO-nun Qeyri-Maddi Mədəni İrs üzrə Reprezentativ Siyahısına daxil edilib.
Qeyd olunub ki, dastan ifaçılığı barədə geniş təsəvvür yaratmaq və onu təbliğ etmək məqsədilə həyata keçirilən layihə həm də bugünkü Azərbaycan aşıq sənətinin bədii-texniki və melopoetik xüsusiyyətlərinin zənginliyini göstərməyə xidmət edir. Muxtar İmanov çıxışı zamanı onu da bildirib ki, layihə çərçivəsində “Abbas-Gülgəz”, “Leyli-Məcnun”, “Kiçik Rza”, “Aşıq Alının Türkiyə səfəri”, “Məhəmməd – Səlbi xanım” “Əmrah - Səlbi” kimi dastanlar tanınmış aşıqların ifasında tamaşaçılara təqdim olunacaq. Giriş nitqindən sonra Azərbaycan Aşıqlar Birliyinin üzvü Aşıq Qələndər Zeynalovun ifasında “Alı xan - Pəri xanım” dastanı təqdim olunub. Aşığı balabanda Əməkdar mədəniyyət işçisi Sərdar Məmmədli müşayiət edib. Ailə-əxlaq mövzusunda olan dastan tamaşaçılar tərəfindən maraqla qarşılanıb.