Akademik Teymur Bünyadovun 90 illik yubileyi qeyd edilib
Beynəlxalq Muğam Mərkəzində görkəmli tarixçi-etnoqraf alim, Əməkdar elm xadimi, akademik Teymur Bünyadovun 90 illik yubileyi ilə bağlı tədbir keçirilib. Tədbir Beynəlxalq Muğam Mərkəzi və AMEA Folklor İnstitutunun birgə təşkilatçılığı ilə reallaşıb. Tədbiri giriş sözü ilə açan AMEA Folklor İnstitutunun direktoru, akademik Muxtar İmanov Teymur Bünyadovun həyat və yaradıcılığı haqqında məlumat verib. Bildirilib ki, akademik 856 elmi əsərin, o cümlədən 35 kitab və monoqrafiyanın, 821 elmi məqalənin, “Göz yaşları” romanının, üçcildlik bayatılar kitabının müəllifidir.
Gecədə Xalq şairi Nəriman Həsənzadə, akademik Nizami Cəfərov, professor Qəzənfər Paşayev, professor Şirindil Alışanov, professor Şahin Fərzəliyev, YAP Yasamal təşkilatının sədri Tağı Əhmədov və başqaları yubilyarı təbrik edib, xoş arzularını bildiriblər.
Sonra tədbir Respublikamızın tanınmış musiqi ifaçılarının konsert proqramı ilə davam edib. Konsertdə ifaçıları Nuriyyə Hüseynovanın bədii rəhbərliyi ilə “Qorqud” folklor ansamblı müşayiət edib.
Sonda akademik Teymur Bünyadov çıxış edərək, tədbirin təşkilatçılarına və iştirakçılarına təşəkkürünü bildirib.
|