AMEA Folklor İnstitutu Elmi Şurasının növbəti iclası keçirilib
İyunun 9-da AMEA Folklor İnstitutu Elmi Şurasının növbəti iclası keçirilib. İclası Elmi Şuranın sədri, AMEA-nın həqiqi üzvü Muxtar İmanov açaraq gündəlikdəki məsələlər haqqında məlumat verib.
İlk olaraq Folklor İnstitutunun Vikipediya ensiklopediyası ilə əlaqədar fəaliyyəti ilə bağlı bilgi verən Muxtar İmanov bu işin gərəkliyi haqqında danışıb, Azərbaycan folkloru və folklorşünaslığı ilə bağlı elmi məqalələrin hazırlanması məqsədilə şöbələrə tapşırıqlar verib.
Elmi Şurada sonra fil.ü.e.d. Seyfəddin Qəniyevin 65 yaşı ilə bağlı fil.ü.e.d. Seyfəddin Rzasoyun məruzəsi dinlənilib. O, S.Qəniyevin folklorşünaslıq fəaliyyətini hərtərəfli şəkildə təhlil edib, ayrıca olaraq Şirvan folklor mühitinin öyrənilməsində, folklor materiallarının toplanılaraq çap edilməsində alimin özünəməxsus rolunu vurğulayıb.
![](images/10.6.2017-5.jpg)
Fil.ü.f.d. E.Məmmədli, fil.ü.f.d. A.Xəlil, fil.ü.e.d. F.Bayat, fil.ü.f.d. R.Xəlilov və başqları Seyfəddin Qəniyev haqqında ürək sözlərini bölüşüb, ona uzun ömür, cansağlığı, elmi fəaliyyətində yeni uğurlar arzulayıblar.
AMEA-nın həqiqi üzvü Muxtar İmanov 65 yaşı münasibətilə yubilyara təbrik bəlgəsini təqdim edib: “Seyfəddin Qəniyev Şirvan bölgəsində pedaqoji fəaliyyətlə yanaşı uzun illər folklor toplama işi ilə də məşğul olub, xeyli zəhmət çəkib. Ayrıca olaraq aşıq sənəti ilə bağlı materialların toplanılması, aşıqların bioqrafiyalarının yazılması, həyatları ilə bağlı müəyyən rəvayətlərin toplanılması, şeirlərinin sistemləşdirilməsi və çap olunması işındə mühüm xidmətləri var. Seyfəddin Qəniyev yazılı ədəbiyyatın problemləri ilə da məşğul olub. Onun kitabları sabahkı folklor-şünaslarımız üçün məxəzdir”.
![](images/10.6.2017-6.jpg)
Sonda cari məsələlərə (2016-2017 tədris ili Folklor İnstitutunun doktoranturasına qəbul olmuş doktorant və dissertantların fərdi iş planlarının təsdiqi; fil.ü.e.d. Əfzələddin Əsgərova, fil.ü.f.d. Tacir Qurbanova və fil.ü.f.d. Səbinə İsayevaya dosent elmi adının verilməsi barədə) baxılıb. Bu haqda İnstitutun elmi katibi, fil.ü.f.d. Elçin Abbasov məlumat verib. Elmi Şura fil.ü.e.d. Əfzələddin Əsgərova, fil.ü.f.d. Tacir Qurbanova və fil.ü.f.d. Səbinə İsayevaya dosent adının verilməsi üçün AAK qarşısında vəsatət qaldırılmasına səs verib.
![](images/10.6.2017-7.jpg)
![](images/10.6.2017-8.jpg)
![](images/10.6.2017-9.jpg) |