Mayın 26-da AMEA Folklor İnstitutunda rəhbər heyətin mülki müdafiə məşqi ilə bağlı tədbir keçirilib. Tədbiri İnstitutun elmi işlər üzrə direktor müavini, fil.ü.f.d. Oruc Əliyev açaraq bu kimi toplantıların hər il keçirilməsinin əhəmiyyəti haqqında danışıb. İnstitutun Mülki Müdafiə Qərargahının rəisi Elşad Quliyev “Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda geniş çıxış edib. O, məşqin məqsədinin rəhbər heyət tərəfindən mülki müdafiə planının öyrənilməsi və dəqiqləşdirilməsi, fövqəladə hallarda davamlı idarə etmənin təkmilləşdirilməsi, mülki müdafiə tədbirlərini yerinə yetirərkən əməkdaşlara rəhbərlik edən rəhbər, komandir-rəis heyətinin hazırlığının artırılması kimi məsələlərdən danışıb. Bundan başqa qərargah rəisi E.Quliyev İnstitutda ehtimal olunan fövqəladə hadisələrdən və bu zaman davranış qaydaları (zəlzələ, yanğın, düşmən hücumu, daşqın, yaralanma, ilkin tibbi yardım qaydaları və s.) haqqında da ətraflı bilgi verib.

O, AMEA II Xüsusi Şöbəsinin bu kimi hallarda əməkdaşların təhlükəsizliyinin təşkili və qorunması ilə bağlı tövsiyə və tapşırıqları, çap olunmuş kitabçalar əsasında hərəkət edilməsinin gərəkliyini vurğulayıb. Tədbirin sonunda fövqəladə hallarda davranış qaydaları haqqında videoçarx nümayiş etdirilib.