“Zaqatala folklor örnəkləri” kitabı çapdan çıxıb
![](images/19.1.2017.jpg)
AMEA İctimai Elmlər Bölməsinin elmi katibi, fil.ü.f.d. Zümrüd Mənsimovanın “Zaqatala folklor örnəkləri” kitabı çapdan çıxıb. Nəfis şəkildə çap olunan kitabın redaktoru və “Ön söz”ün müəllifi AMEA Folklor İnstitutunun aparıcı elmi işçisi, fil.ü.f.d. , dos. Mətanət Yaqubqızıdır.
Kitabda 1996-2016-cı illər ərzində Zaqatala bölgəsindən, xüsusilə də Qımır, Çobankol, Bazar, Muxax, Suvagil, Gözbarax, Yuxarı Çardaxlar, Tala, Qandax, Faldar, Əliabad, Muğanlı, Yengiyan, Car, Mamrıx, Zəyəm, Bəhmədli kəndlərindən toplanmış mövsüm-mərasim, məişət-mərasim adət-ənənələri, bayatılar, nazlamalar, oxşamalar, xoyratlar, tapmacalar, lətifələr, əfsanə və rəvayətlər, nağıllar, dastanlar və s. əksini tapıb.
Kitaba daxil edilən janrlar içərisində lətifələr xüsusilə seçilir. Azərbaycanda hər bir bölgənin tanınmış lətifə ustadı – Şəkidə Hacı dayı, Qarabağda Abdal Qasım və s. olub ki, Zaqatalanın Yuxarı Çardaxlar kəndinin sakini Hudul kişini də bu bölgənin Hacı dayıya bərabər lətifəbazı adlandırmaq olar. “Bilet hələ cibimdədir”, “Atasına tapşıraram”, “Can qardaş, sən turpax yolla get” və b. lətifələr Hudul kişinin adı ilə bağlıdır.
Kitaba bölgə ərazisində yaşayıb-yaradan aşıq və el şairlərimizin şeirləri, deyişmələri və “Aleybadlı Aşıq Hüseyn”, “Bəhrinazla Aşıq Mədət”, “Tale ilə Aşıq Mədət” kimi dastanları da daxil edilib.
|