AMEA Folklor İnstitutunun direktoru, AMEA-nın müxbir üzvü Muxtar Kazımoğlu - İmanov noyabrın 17-də Türkiyə-Azərbaycan əlaqələrinin möhkəmlənməsi üçün səmərəli fəaliyyətləri ilə diqqət çəkən folklorşünaslar Nail Tan və Xeyrəddin İvgini qəbul edib.

Görüşdə Folklor İnstitutunun “Xarici əlaqələr” bölməsinin müdiri Əli Şamil, həmin şöbənin əməkdaşı Aynur Qəzənfərqızı, folklor tədqiqatçısı, şair Adil Cəmil də iştirak ediblər.

N.Tan və X.İvgin indiyədək Folklor İnstitutu ilə Türkiyənin müvafiq qurumlara arasında bir-neçə birgə elmi tədbirlərin təşkilində xüsusi rol oynamışlar. Folklor İnstitutunun nəşr etdirdiyi kitabların Türkiyədə tanıdılmasında da böyük xidmətləri olan alimlərin növbəti gəlişi X.İvginin “Manas” dastanı əsasında yazdığı romanın Azərbaycan türkcəsinə çevrilməsi və nəşri ilə bağlı olub. Müəllif kitabından bir neçə nüsxəni AMEA Folklor İnstitutunun kitabxanasına bağışlayıb. Görüşdə həmçinin 2017-ci ildə birgə keçiriləcək toplantıların planı müzakirə edilib.