Fransanın Yuxarı Alzas Universiteti ilə AMEA Folklor İnstitutu arasında əlaqələr qısa müddətdə xeyli genişlənib. Belə ki, AMEA Folklor İnstitutunun əməkdaşları Yuxarı Alzas Universitetində keçirillən simpoziumda məruzə oxuyub, eləcə də Yuxarı Alzas Universitetinin əməkdaşları bir neçə dəfə AMEA Folklor İnstitutunda olublar. Əlaqələrin genişlənməsində Xocalı faciəsinə “Xocalı-613” adlı simfonik əsər həsr etmiş fransız bəstəkarı Pyer Tiluanın böyük rolu olub. Ötən illərdə bir neçə dəfə Folklor İnstitutunda olan bəstəkar İnstitut rəhbərliyinin xahişi ilə “Kitabi-Dədə Qorqud” dastanlarının sujeti əsasında “Dədə Qorqud” simfonik poemasını yaradıb.

2016-cı il dekabrın 5-6-da isə Yuxarı Alzas Universitetində “Multikulturalizm, mədəniyyətlərarası əlaqə və kompleks identiklik: Qafqaz örnəyi” mövzusunda beynəlxalq elmi simpozium keçirilməsi planlaşdırılıb. Simpozium ərəfəsində Yuxarı Alzas Universiteti Filologiya fakültəsi dekanı Qreta Komur Tilua, onun həyat yoldaşı, bəstəkar Pyer Tilua, həmçinin fakültənin əməkdaşı Tatyana Musinova və tələbələr Nikoli Cub, İnkar Karamayeva Folklor İnstititunun qonağı olublar. Qonaqları İnstitutun direktoru, AMEA-nın müxbir üzvü, professor Muxtar Kazımoğlu-İmanov qəbul edib.

Görüş zamanı Qreta Komur Tilua Yuxarı Alzas Universitetinin fəaliyyəti haqqında məlumat verib. M.Kazımoğlu-İmanov da AMEA Folklor İnstitutunun gördüyü işlərdən danışıb. Söhbət zamanı həmçinin bəstəkar Pyer Tiluanın “Dədə Qorqud” simfonik poemasının Bakıda səsləndirilməsi məsələsi də müzakirə edilib.