Folklor İnstitutunun əməkdaşları Ankarada keçirilən
beynəlxalq simpoziumda iştirak ediblər
AMEA Folklor İnstitutunun əməkdaşları 29 sentyabr - 01 oktyabr 2016-cı il tarixlərində Türkiyənin Ankara şəhərində Hacəttəpə Universitetinin Ədəbiyyat Bölümü ilə Kazan Bələdiyyəsinin birgə təşkil etdikləri “IV Uluslararası Xalq Mədəniyyəti Simpoziumu”nda (IV Uluslararası Halk Kültürü Sempozyumu) iştirak ediblər.
Simpoziumu Türkiyə Respublikası Prezidenti Rəcəb Tayyip Ərdoğanın baş məsləhətçisi Yalçın Topçu açıb. O, tədbir iştirakçılarını salamladıqdan sonra geniş məruzə ilə çıxış edib. Açılış iclası Hacəttəpə Universiteti Türk Halkbilimi Bölümü müdiri Prof. Dr. Özkul Çobanoğlunun giriş sözü, Kazan Bələdiyyəsi başkanı Lokman Ertürk və Prof. Dr. İlhami Durmuşun məruzələri ilə davam edib.
Simpoziumda AMEA Folklor İnstitutu “Dədə Qorqud” şöbəsinin əməkdaşları – aparıcı elmi işçi, fil.ü.f.d., dos. Ləman Süleymanova ilə Məhsəti Süleymanovanın birgə yazdıqları “Haylaçı Sənəmin həyatı və yaradıcılığı” adlı məruzə xüsusi maraq doğurub və simpozium iştirakçılarının çoxsaylı suallarına səbəb olub. Fil.ü.f.d., dos Ləman Süleymanova həm də iclaslardan birinə sədrlik edib.
![](images/11.10.2016-4.JPG) Folklor İnstitutu “Mərasim folkloru” şöbəsinin əməkdaşı fil.ü.f.d., dos. Qalib Sayılovun “Türk etnik-kültürəl düşüncə tarixində çoban paradiqması” mövzusunda çıxışı da simpoziumda diqqəti cəlb edən məruzələrindən biri olub.
İnstitutun “Musiqi folkloru” şöbəsinin əməkdaşı Fəridə Mirişovanın “Azərbaycanın Güney bölgəsinin musiqi folkloru” adlı məruzəsi də simpozium iştirakşıları tərəfindən maraqla qarşılanıb.
8 ölkədən 150 elm adamının iştirak etdiyi simpoziumda umumilikdə 3 salonda 33 toplantı keçirilib. Simpozium günlərində iştirakçılar Türkiyə Cumhuriyyətinin ilk qadın millət vəkili olmuş Hatı Çırpanın ev muzeyini – “Kazan Belediyyesi Satıkadın Müze Evi”ni və Kazan bələdiyəsini ziyarət edib, Kazan ilçəsinin Karalar kəndində keçirilmiş toy mərasiminə də qatılıblar. |