“COLAN TÜRKMANLARI (FOLKLOR VƏ ETNOQRAFİYA ÖRNƏKLƏRİ)” KİTABI TƏBRİZDƏ NƏŞR EDİLDİ
Təbrizin “Dənizçin” nəşriyyatı 2014-cü ildə AMEA Folklor İnstitutunun yayımladığı “Colan Türkmanları (folklor və etnoqrafiya örnəkləri)” kitabını hicri təqvimi ilə 1395, miladi təqvimi ilə isə 2016-cı ildə əski əlifbaya uyğunlaşdıraraq çap etmişdir. Kitabı Folklor İnstitutunun Xarici Əlaqələr bölməsinin müdiri Əli Şamil hazırlamışdır. Nəşr olunduqdan qısa bir müddət sonra Türkmənistan, Özbəkistan, Qazaxıstan və b. respublikaların mətbuatında kitab haqqında məqalələr yazılmış, Türkiyə jurnalları isə kitabdan bəzi hissələri yayınlamışdır. Kitab Suriyada yaşayan Türkmanlar haqqında yazılmış ilk sistemli əsər kimi dəyərləndirilmişdir. Kitabda Suriyada yaşayan Türkmanların sayı, onların soykökü, yaşadıqları kəndlərin siyahısı, folklor və dialektlərindən örnəklər, mərasimləri haqqında geniş bilgi verildiyindən geniş oxucu marağına səbəb olmuşdur.
Təbrizin “Dənizçin” nəşriyyatı üçün hazırlanmış variantını əski əlifbaya Məhbubə Herisçiyan çevirmiş, Həsən Umudoğlu isə redaktorluğunu etməklə yanaşı, İran İslam Respublikasinda yaşayan türklərin anlaya bilməyəcəyi söz və terminlərin izahını da vermişdir. Tərtibatını Mehdi Meyməndinin verdiyi 144 səhifəlik kitab 1000 tirajla işiq üzü görmüşdür.
![](images/4.10.2016-1.jpg)
|