“Müdrik Qoca arxetipinin semantik strukturu və paradiqmaları” adlı monoqrafiya işıq üzü görüb

    AMEA Rəyasət Heyətinin elmi katibi, filologiya üzrə fəlsəfə doktoru  Hikmət Quliyevin  “Müdrik Qoca arxetipinin semantik strukturu və paradiqmaları” adlı monoqrafiyası işıq üzü görüb.

    “Elm və Təhsil” nəşriyyatı tərəfindən nəfis şəkildə çap olunan monoqrafiyanın elmi redaktoru və ön sözün müəllifi  Folklor İnstitutunun  direktoru, AMEA-nın müxbir üzvü  Muxtar Kazımoğlu , rəyçiləri isə filologiya üzrə elmlər doktoru  Seyfəddin Rzasoy , filologiya üzrə elmlər doktoru  Xatirə Bəşirli  və filologiya üzrə fəlsəfə doktoru Etibar Talıblıdır.

 Monoqrafiya Müdrik Qoca arxetipinin folklor transformasiyalarının müəyyənləşdirilməsi baxımından folklorşünaslığımız üçün mühüm əhəmiyyət kəsb edir. Müəllif kitabında geniş elmi axtarışlara söykənərək, müasir nəzəri-metodoloji yanaşmalar kontekstində Azərbaycan folklorunda Müdrik Qoca arxetipi və onun çoxsaylı təzahür səviyyələrini şərh edib. Tədqiqatda Müdrik Qoca arxetipinin təzahür səviyyələri, obraz paradiqmaları, sosiokulturoloji aspektləri öyrənilib.

    Müəllif tədqiqatını xalqın kollektiv yaddaşını özündə ehtiva edən mifoloji mətnlər, atalar sözləri və deyimlər, əfsanə, rəvayət, lətifə, memuar, nağıl, dastan, epos və s. üzərində aparmaqla Müdrik Qoca arxetipinin emosional özünüifadə modellərini geniş araşdırıb.

  Avropa və Amerika folklorşünaslığının nəzəri-metodoloji təcrübəsindən geniş istifadə olunan monoqrafiyada folklor mətnləri yeni baxış bucağından tədqiqata cəlb edilib.

    Kitab ali məktəb müəllimləri və tələbələr, mütəxəssislər, həmçinin folklor mövzuları ilə maraqlanan geniş oxucu kütləsi üçün nəzərdə tutulub.