Macar-Azərbaycan Dostluq Cəmiyyətinin sədri Folklor İnstitutunda olub
![](images/8.6.2016-3.JPG) 13 iyun 2016-c ı il tarixində Macar-Azərbaycan Dostluq Cəmiyyətinin sədri Svetlana Abdullayeva AMEA Folklor İnstitutunu qonağı olmuşdur. Görüşdə AMEA Folklor İnstitutunun direktoru, AMEA-nın müxbir üzvü Muxtar İmanov, Nizami adına Ədəbiyyat İnstitutunun direktor müavini professor Məhərrəm Qasımlı, AMEA Folklor İnstitutunun “Klassik folklor” şöbəsinin müdiri, filologiya üzrə fəlsəfə doktoru, dosent Rza Xəlilov, həmin şöbənin aparıcı elmi işçisi, filologiya üzrə fəlsəfə doktoru, dosent Afaq Ramazanova, İnstitutun Xarici əlaqələr bölməsinin müdiri Əli Şamil iştirak etmişlər. Görüşün əvvəlində Muxtar İmanov qonaq – Svetlana xanımın xaricdə Azərbaycanın, onun mədəniyyətinin və folklorunun təbliği sahəsində gördüyü işlər barədə məlumat vermişdir.
Son illər Macarıstanda yaşayan Svetlana Abdullayeva 101 Azərbaycan nağılını macar dilinə tərcümə edərək 2013-2014-cü illərdə üçcildlik halında Macarıstanın paytaxtı Budapeştdə nəşr etdirmişdir. Görüşdə mütəxəssislərin marağına səbəb olan bu üçcildliyin nəşri ətrafında fikir mübadiləsi aparılmış, tərcüməçi və naşir Svetlana xanım kitablara salınmış nağılların seçilməsi prinsipləri, tərcümə zamanı rastlaşdığı çətinliklər və s. barədə ətraflı məlumat vermişdir. Görüş iştirakçıları yekdil olaraq bu nəşrin böyük əhəmiyyətə malik olduğunu söyləmiş, bu üçcildliyin Azərbaycan nağıllarının bu həcmdə (101 nağıl) qeyri-dillərə tərcüməsi sahəsində ilk təcrübə olduğunu vurğulamışlar. Muxtar İmanov yaxın zamanlarda AMEA Folklor İnstitutunun AMEA Nizami adına Ədəbiyyat İnstitutu ilə birgə Azərbaycan nağıllarının macar dilindəki üçcildliyinin təqdimat mərasiminin keçiriləcəyini bildirmişdir.
AMEA Folklor İnstitutunun direktoru Muxtar İmanov qonaqlara AMEA Folklor İnstitutunun son nəşrlərini təqdim etmişdir.
![](images/8.6.2016-5.JPG)
![](images/8.6.2016-6.JPG) |