Əməkdaşımız Türkiyə və İspaniyada keçirilən beynəlxalq tədbirlərdə iştirak edib

    11-12 may 2016-cı il tarixində Türkiyənin İstanbul şəhərində “Müzikte Metodoloji ve Müzikle İletişim” adlı Beynəlxalq Simpozium keçirilmişdir. Simpoziumu İstanbul Türk Muzigi Dernek ve Vakıfları Dayanışma Konseyı (MUZDAK) ilə İstanbul Şişli Meslek Yuksekokulu birlikdə təşkil etmişlər. Simpoziuma qatılan alimlər musiqinin tədrisi metodologiyası, onun nəzəri və praktik tərəfləri üzərində apardıqları elmi araşdırmaları təqdim etmişlər.

    Tədbirdə AMEA Folklor İnstitutunun “Musiqi folkloru” söbəsinin müdiri, sənətşünaslıq üzrə elmlər doktoru, professor Nailə Rahimbəyli iclaslardan birinə sədrlik etmiş, həm də “Şifahi ənənənli professional musiqinin tədrisi metodologiyası” başlıqlı məruzəylə çıxış etmişdir.

    Sən.ü.e.d. Nailə Rəhimbəyli daha sonra – 19-22 may 2016-cı il tarixində İspaniyanın paytaxtı Madriddə keçirilən “I Ulus­lararası Elmi Araşdırmalar Konfransı: İnsan və İctimai Elmlər” adlı tədbirə qatılmışdır. Journal of the International Scientific Researches (IBAD) və Autonoma de Madrid Universitetinin birgə təşkil etdiyi konfransda humanitar və ictimai elmlərdə mövcud yeniliklər, problemlər və onların gələcək perspktivlərinə dair dərin məzmunlu məruzələr yer almişdır. Nailə Rəhimbəylinin “Azərbaycan şifahi ənənəli musiqisi – aşıq və muğam sənəti: tarix və müasirlik” adlı məruzəsi tədbir iştirakçılarının böyük marağına səbəb olmuşdur.