Gülüşlə bağlı önəmli tədbir

    13-15 may 2016-cı ildə Türkiyənin Rizə şəhərində “Türk ədəbiyyatında mizah (yumor)” mövzusunda Beynəlxalq Simpozium keçirilib. Türk Dil Qurumu və Recep Tayyip Erdoğan Universitetinin təşkilatçılığı ilə keçirilən həmin Simpozium özünün səliqə-sahmanı və məruzələrin elmi dəyərinə görə xüsusi olaraq seçilib. Özkul Çobanoğlu, Gülin Öğüt Eker, Nəbi Özdemir, Orhan Kemal Tavukçu, Muhammet Nur Doğan, Fazıl Gökçek, Esma Şimşek, Şeref Boyraz, İsmet Çetin, Ali Yakıcı, Ülkü Eliuz və b. tanınmış elm adamlarının qatıldığı Simpozium öz işini 13 bölmə əsasında qurub. Bölmələrdə xalq ədəbiyyatı və gülüş, klassik ədəbiyyat və gülüş, çağdaş ədəbiyyat və gülüş, gülüşün magik və estetik tərəfləri, cəmiyyətdə mövcud etiketlər və gülüş, qəliblər və gülüş və s. problemlərlə bağlı məruzələr dinlənilib, məruzələr ətrafında səmərəli fikir mübadiləsi aparılıb.

    Simpoziumda Azərbaycanı iki elm adamı - AMEA-nın müxbir üzvü, AMEA Folklor İnstitutunun direktoru Muxtar Kazımoğlu-İmanov və filologiya üzrə elmlər doktoru, AMEA Folklor İnstitutunda “Müasir folklor” şöbəsinin müdiri Füzuli Bayat təmsil edib.

    Bölmələrdən birinə oturum başqanlığı (sədrlik) edən Muxtar Kazımoğlu-İmanov Simpoziumda “Gülüşün magik mahiyyəti” mövzusunda məruzə ilə çıxış edib.

    “Sözlü (şifahi) kültürdə protesto yönüylə mizah” adlı məruzə ilə Simpoziuma qatılan Füzuli Bayat Simpoziumun dəyərləndirmə iclasında da çıxış edib.