Əməkdaşlarımız Konyada konfransda iştirak ediblər
![](images/24.5.2016-2.jpg) 12-14 may tarixlərində Türkiyənin Konya şəhərində VI Beynəlxalq Türk İncəsənət, Tarix və Folklor Konfransı keçirilmişdir. Beynəlxalq YOCOCU Asossiasiyası, MİRAS Mədəni İrsin Öyrənilməsinə Kömək İctimai Birliyi, Selcuk Universiteti Türk Əl Sənətləri Araşdırma və Tətbiqetmə Mərkəzi, Konya şəhər bələdiyyəsi, Nişantaşı Universiteti və Makedoniya Sosial-Mədəni Antropologiya İnstitutunun birgə təşkilatçılığı ilə baş tutan konfransda Folklor İnstitutunun əməkdaşları – böyük elmi işçi Sahibə Paşayeva “Sədnik Paşa Pirsultanlı və Azərbaycan əfsanələri” və filologiya üzrə fəlsəfə doktoru, dosent Sönməz Abbaslı “Qarabağ folklorunda miflər, mifik əfsanə və rəvayətlər” adlı məruzə ilə iştirak ediblər. Qeyd edək ki, konfransda 8 ölkədən ─ Azərbaycan, İran, İtaliya, Moldova, Makedoniya, Almaniya, Türkmənistan və Türkiyədən 130-a qədər nümayəndə iştirak edib. Azərbaycan alimlərindən AMEA Memarlıq və İncəsənət İnstitutunun direktoru, AMEA-nın müxbir üzvü Ərtegin Salamzadənin “Türk incəsənətində Qorqud obrazı”, AMEA Arxeologiya və Etnoqrafiya İnstitutunun böyük elmi işçisi, prosessor Qafar Cəbiyevin “Girdman vilayətinin ilk orta əsr mədəniyyət abidəsləri”, Azərbaycan Texniki Universitetinin professoru Şikar Qasımovun “Tarixi abidələr mədəni irsimizin ayrılmaz parçasıdır”, MİRAS Mədəni İrsin Öyrənilməsinə Kömək İctimai Birliyinin sədri, tarix üzrə fəlsəfə doktoru Fariz Xəlillinin “Axtaçılar”, Azərbaycan Dövlət Pedaqoji Universitetinin dosenti, pedaqogika üzrə fəlsəfə doktoru Nazilə Abdullazadənin “XX əsr Azərbaycan şairi Əliağa Vahidin lirikasında gül və bülbül poetik obrazları”, Avrasiya Universitetinin baş müəllimi Çiçək Hüseynovanın “Çağdaş Azərbaycan nəsrində ədəbi detallar (Elçinin “Qarabağ şikəstəsi” hekayəsi və “Bayraqdar” adlı qısa romanı)”, AMEA Əlyazmalar İnstitutunun elmi işçisi Tahirə Əliyevanın “Piri Rəisin “Kitab-i Bahriyye” əsərində yeddi dəniz”, Azərbaycan Dövlət Mədəniyyət və İncəsənət Universitetinin doktorantı Günel Seyidəhmədlinin “Azərbaycanın qadın heykəltəraşları”, AMEA Memarlıq və İncəsənət İnstitutunun doktorantı Gülşən Qasımzadənin “Azərbaycan tarixi sarayları və onların bədii tərtibatında istifadə olunmuş xalılar” adlı məruzələri də böyük maraq doğurub. Konfransın sonuncu günü iştirakçılar Sille antik dövr abidəsini, Mövlanə Cəlaləddin Ruminin türbəsi və xatirə muzeyini, Karatay mədrəsəsi və muzeyini ziyarət ediblər.
![](images/24.5.2016-4.jpg)
![](images/24.5.2016-3.jpg)
|