Aprelin 26-sı Bakı Slavyan Universitetinin bir qrup tələbəsi ilə AMEA Folklor İnstitutunun doktorantı, AJB və AYB-nin üzvü, prezident təqaüdçüsü Cəmilə (Çiçək) İsbəndiyarovanın görüşü keçirilib.
    Bilik Fondunun dəstəyi ilə keçirilən görüşdə "Azərbaycan məhəbbət dastanlarında sevgiyə sadiqlik" mövzusu ilə çıxış edən Cəmilə Çiçək, klassik qəhrəmanlıq dastanlarımızdan olan "Kitabi-Dədə Qorqud" boylarında məhəbbət çalarlarından, Selcan xatunun Qanturalıya olan sadiqliyindən, fədakarlığından, Beyrəklə Banıçiçəyin uzun illərin sınağından sonra yenidən bir-birinə qovuşmasından danışıb. Yeni dövrün yaradıcı məhsulu olan, özünün tərtibçisi və nəsr hissəsinin müəllifi olan, eyni zamanda akademik Kamal Abdullanın rəyçisi olduğu, Əyyub Cabbarovun şeirlər toplusunun motivləri əsasında qələmə alınan "Əyyub və Sənəm dastanı"ndan söhbət açan Cəmilə Çiçək, at minən, cıdır yarışına çıxan qızlarımızın sevgi imtahanından da alnıaçıq, üzüağ çıxmaq istəməsi, lakin keçmişdən qalan, bu gün də davam edən var-dövlət hərisliyi, övladın arzu və istəyi ilə hesablaşmamaq duyğusunun ailə münaqişəsinə yol açdığını vurğulayıb.

    Diskussiya şəklində keçən görüşdə tələbələrin istəyi ilə C.Çiçək bir sıra şeirlərini səsləndirib. O, çıxışının sonunda "Azərbaycan məhəbbət dastanlarında sevgiyə sadiqlik" mövzusunun tələbələrin diqqətini çəkdiyini, həvəslə dinlədiklərini, folklorumuza, dastanlarımıza maraqlarının olmasını, eyni zamanda şifahi xalq yaradıcılığı nümunələrindən məlumatlarının məhdud olduğunu, çağdaş dövrümüzdə də yeni dastanların yaranmaqda olduğunu bir qədər təəccüblə qarşıladıqlarını söyləyib. Elə bu səbəbdən də ali məktəblərdə şifahi xalq ədəbiyyatının tədrisinə ayrılan saatların sayının artırılmasını və tədris proqramında dastanlara daha çox yer verilməsini münasib görüb. Qeyd edək ki, görüşün sonunda auditoriyanın mühazirəyə maraq səviyyəsi müvafiq olaraq ən yüksək bal (5 bal) qiymətləndirilib.
Azadə Bayramova