Əməkdaşlarımız “Xalq mədəniyyətində ailə” mövzusunda beynəlxalq simpoziumda iştirak ediblər

    25-27 mart 2016-cı il tarixlərində Türkiyənin Ədirnə şəhərində “Xalq mədəniyyətində ailə” mövzusunda beynəlxalq simpozium keçirilib. Simpoziumu Türkiyə Cümhuriyyəti Mədəniyyət və Turizm Nazirliyi, Trakya Universiteti və Motif vəqfi birlikdə təşkil edib. Simpozium bu yaxınlarda vəfat etmiş tanınmış türk folklorçusu, professor Erman Artunun xatirəsinə həsr olunub.
    Simpoziumun proqramına AMEA Folklor İnstitutunun şöbə müdiri Ağaverdi Xəlilin “Türk dastanlarında evlənmə şəkilləri”, İnstitutun elmi əməkdaşları Qalib Sayılovun “Azərbaycanda ailədaxili qarşılıqlı münasibətlər”, Aynur Cəlilovanın “Azərbaycan-türk ailəsinin inanc və sınamaları”, Akifə Xəlilovanın “Azərbaycan və ingilis atalar sözlərində ailə konsepti” adlı məruzələri daxil edilib.
    Tədbiri Motif vəqfinin rəhbəri Zəki Baykal açaraq türk cəmiyyətində ailənin önəmi və müasir dövrdə ailə dəyərlərinin qorunmasının vacibliyindən bəhs edib. Trakya Universitetinin rektoru, professor Yener Yörük də açılış iclasındakı çıxışında türk ailə mədəniyyətinin dərindən öyrənilməsinin və yaşadılmasının zəruriliyini vurğulayıb.
    Üç bölmədə iki gün davam edən simpoziumun iclaslarında 100-dən çox məruzə dinlənilib. Məruzələrdə türk xalqlarında ailə mədəniyyəti ən müxtəlif istiqamətlərdən araşdırılb. Məruzələr “Xalq kültürndə ailə” adlı məcmuədə nəşr edilib.
    Simpozumun iclasları bitdikdən sonra qonaqları Ədirnə şəhərinin tarixi abidələri ilə tanış etmək üçün gəzinti proqramı həyata keçirilib.