Folklor İnstitutu Elmi Şurasının iclası keçirilib

    Martın 16-da Folklor İnstitutu Elmi Şurasının növbəti iclası keçirilib. İclası giriş sözüylə İnstitutun direktoru, AMEA-nın müxbir üzvü Muxtar Kazımoğlu-İmanov açaraq gündəlikdəki məsələlər haqqında məlumat verib.

    İlk olaraq İ nstitut Elmi Şurasının tərkibində qismən dəyişiklik edilməsi barədə məsələyə baxılıb, şöbə müdirləri Nizami Muradoğlu, Mətanət Abbasova və Ramazan Qafarlı şuraya yeni üzvlər qəbul olunublar.

    Şuranın sədri M.Kazımoğlu-İmanov İnstitutda Təhsil şöbəsinin yaradılmasının gərəkliyi haqqında məlumat verib. Bildirib ki, belə şöbənin yaradılması İnstitutda doktorantura və magistratura təhsilinin həyata keçirilməsi, orta və ali məktəb müəssisələri ilə əməkdaşlığın gücləndirilməsi, gənc nəslin elmə marağının artırılması məqsədi daşıyır. Bundan sonra Elmi Şura İnstitutun Təhsil şöbəsinin yaradılması haqqında qərar qəbul edib.

    “Xarici əlaqələr” bölməsinin müdiri Əli Şamil xarici ezamiyyələr və Folklor İnstitutun beynəlxalq əlaqələri barədə çıxış edib. Bu işin daha səviyyəli şəkildə həyata keçirilməsi qərara alınıb.

    Elmi Şura fil.ü.f.d. Mətanət Abbasova, fil.ü.f.d. Aynur Hüseynova və fil.ü.f.d. Mətanət Yaqubqızına dosent elmi adının verilməsi barədə məsələyə də baxıb və həll edib.

    Sonda fil.ü.e.d. Kamil Allahyarov “Novruz, yoxsa Mitra bayramı” mövzusunda məruzə edib. O, Novruzun türk bayramı olduğunu, əslində farsların həmin bayramı yaranışdan min il sonra qəbul etdiklərini və qəbul edərkən özlərinin Mitra bayramlarının ayin və mərasimlərini Novruza əlavə etdiklərini bildirib. İclas məruzə ətrafında müzakirələrlə sona yetib.