Muxtar Kazımoğlunun “Sənət qayğıları” adlı yeni kitabı çap olunub

  AMEA Folklor İnstitutunun direktoru, AMEA-nın müxbir üzvü Muxtar Kazımoğlu-İmanovun “Sənət qayğıları” adlı yeni kitabına müxtəlif illərdə yazılan, şifahi və yazılı ədəbiyyatın düşündürücü məsələlərinə həsr edilən məqalələri və iki müsahibəsi daxil edilib (Bakı, “Elm və təhsil”, 2015, 192 səh.).

    3 bölmədən ibarət olan kitabın birinci bölməsi “Şifahi söz sənəti” adlanır. Bu bölmədə “Oyunlar və ayinlər (Qarabağ nümunələri əsasında)”, ““Dədə Qorqud” eposunda yuxarı və aşağı paralelliyi”, “Folklorda lokallıq və universallıq”, “Qaravəllilərin ilkin mahiyyəti”, “Güney Azərbaycandan “Koroğlu” töhfəsi” kimi məqalələr verilmişdir. Kitabın ikinci bölməsi “Yazılı söz sənəti” adlanır. Bu bölməyə “Qətl günləri, ölülər və dirilər”, “Sənətkarın əyilməzliyi”, “Tənhalıq qıfılbəndi”, “Adım ayrılıqdır”, “Kövrəklik və ötkəmlik”, “Teymur Kərimli ilə klassik ədəbiyyat üstündə dərdləşmə”, “Yorğunluq”, “Oxu kitablarında vətənpərvərlik dərsləri”, “Mirzə Cəlil yurdunda ədəbi proses” kimi məqalələr daxil edilmişdir. Kitabın üçüncü bölməsində (“Söz sənəti və ömür-gün qayğıları”) “Adam dilində yazın”, “Görüləsi işlərimiz çoxdur” kimi müsahibələr toplanıb.

    Kitabın redaktoru fil.ü.f.d. Vəfa İsgəndərovadır.