AMEA Folklor İnstitutunun əməkdaşları İran İslam Respublikasında son günlər baş verən hadisələrə biganə qalmayaraq, fars rejiminin dinc əhaliyə, xüsusilə də qanbir-canbir qardaşlarımıza qarşı törətdikləri vəhşiliklərə etiraz səslərini ucaltmaqdadırlar. Belə ki, Güney Azərbaycan folklor örnəklərinin toplanıb nəşr edilməsi, tədqiqi ilə məşğul olan əməkdaşlarımız son günlərdə daha da fəallıq göstərirlər. Müxtəlif mövzuda yazdıqları məqalələrlə mətbu orqanlarda çıxış edən əməkdaşlarımız bu yazılarla Güneyli soydaşlarımızla həmrəylik nümayiş etdirdiklərini, bu çətin dönəmlərdə onların yanında olduqlarını sübut etməkdədirlər.
İnstitutumuzun “Cənubi Azərbaycan folkloru” şöbəsinin müdiri, filologiya üzrə fəlsəfə doktoru, dosent Mətanət Maşallahqızı (Abbasova) “Təbrizin folklor inciləri” (“Xalq qəzeti”, 22 noyabr, 2022), həmin şöbənin aparıcı elmi işçisi filologiya üzrə fəlsəfə doktoru Qiymət Məhərrəmli “İranda Türk milli kimliyini yaşadan aşıq sənəti” (“Xalq qəzeti”, 24 noyabr, 2022), “Türk xalqları folkloru” şöbəsinin müdiri, filologiya üzrə fəlsəfə doktoru, professor Əfzələddin Əsgər “Əziz Təbriz” (“Xalq qəzeti”, 26 noyabr, 2022), “Cənubi Azərbaycan folkloru” şöbəsinin elmi işçisi Səbuhi Bədəlov “Güneydə yaranan xalq ədəbiyyatı inciləri” (“Xalq qəzeti”, 30 noyabr, 2022) mövzusunda maraq doğuran yazılarla çıxış etmişlər.
Təbii ki, Güneyimizin milli-mənəvi dəyərləri, tarixi keçmişi və bugünü, folklor örnəkləri olduqca zəngin bir xəzinədir. Həmin zəngin xəzinənin nəsildən-nəsilə ötürülərək daha da inkişaf etdirilməsi üçün göstərilən çabalar, soydaşlarımızın davamlı cəhdləri isə daim fars rejiminin qəddar siyasətinin təzyiqi ilə yatırılmağa çalışılır.
Güneyli qardaş-bacılarımızın üzləşdikləri haqsızlıqlar, mədəniyyət, ədəbiyyat, milli-mənəvi dəyərlər, dil və anadilli məktəb və s. kimi problemləri ilə bağlı yazılarımız davamlı olaraq dövri mətbuatda işıq üzü görəcəkdir.

Qiymət MƏHƏRRƏMLİ