Xalq artisti Mələkxanım Əyyubovanın 60 illik yubileyi qeyd olunub

Oktyabrın 28-də Beynəlxalq Muğam Mərkəzində AMEA Folklor İnstitutu və Beynəlxalq Muğam Mərkəzinin birgə təşkilatçılğı ilə muğam ifaçısı, Azərbaycan Respublikasının Xalq artisti, professor Mələkxanım Əyyubovanın 60 illik yubileyinə həsr olunmuş tədbir keçirilib. Proqramın aparıcısı – Opera və Balet Teatrının baş rejissoru, əməkdar incəsənət xadimi Hafiz Quliyev giriş sözü ilə qonaqları salamlayıb. Sonra AMEA Folklor İnstitutunun baş direktoru akademik Muxtar Kazımoğlu-İmanov çıxış edərək Mələkxanım Əyyubova haqqında öz ürək sözlərini deyib. Akademik Mələkxanım Əyyubovanın bir vaxtlar Folklor Sarayı Elmi Mədəni Mərkəzinin nəzdində fəaliyyət göstərən “İrs” folklor ansamblının solisti olduğunu xatırladaraq bildirib ki, Xalq artistini də məhz ilk dəfə sözügedən ansamblın solisti kimi tanıyıb. Akademik qeyd edib ki, məlahətli səsi, professional sənəti ilə o vaxtdan şöhrət qazanan və sevilən Mələkxanım Əyyubova dünyanın ən böyük ölkələrinin səhnələrində Azərbaycan musiqisini ləyaqətlə təmsil edir. Akademikin fikrincə, həm opera sənətində, həm də digər sahələrdə çalışan Mələkxanım Əyyubovanın ən böyük uğuru xalqın məhəbbətini qazanmağıdır:

“Xalqın məhəbbətini qazanmaq həm də onu sübut edir ki, folklorla bağlı, xalqın mədəniyyəti ilə bağlı şərəfli yol keçə və dünyanın ən böyük mədəniyyətlərini Azərbaycan mədəniyyəti ilə qovuşdura biləsən”. Muxtar İmanov fikirlərinə onu da əlavə edib ki, indi haqqında daha çox danışılan dünyaya inteqrasiyanın ən vacib fəlsəfəsi ondadır ki, öz milli mənliyini ortaya qoyasan və dünya məhz bu yolla səni qəbul etsin. Mələkxanım Əyyubova o sənətkarlardandır ki, Azərbaycan milli mədəniyyətini, musiqisini, muğamını, xalq mahnılarını, təsniflərini dünyaya milli mədəniyyət fəlsəfəsi ilə çatdıra bilir. Akademik çıxışının sonunda böyük sənətkarı həm Folklor İnstitutu, həm də bütövlükdə AMEA adından təbrik edərək, ona yeni-yeni uğurlar arzulayıb.

Tədbirin ərsəyə gəlməsində böyük əməyi olan, “Qorqud” folklor ansamblının rəhbəri, əməkdar artist Nuriyyə Hüseynova da çıxışında Mələkxanım Əyyubovanın sənət yolundan bəhs edib, rəhbərlik etdiyi musiqi kollektivi adından ona yeni-yeni yaradıcılıq uğurları arzulayıb.
Yubilyarı təbrik edənlər arasında Mədəniyyət Nazirliyinin musiqi sektorunun müdiri Vüqar Hümbətov, respublikanın Xalq atristləri – Alim Qasımov, Mənsum İbrahimov, Səkinə İsmayılova, Vamiq Məmmədəliyev, Mətləb Müslümov, Millət vəkili Qənirə Paşayeva və digərləri də olub. Mələkxanım Əyyubova tədbir təşkilatşılarına təşəkkürünü bildirdikdən sonra Əhməd Bakıxanov adına xalq çalğı alətləri ansamblının müşayiəti ilə öz repertuarından mahnılar ifa edib.