Bu günlərdə əsərləri dünyanın əllidən çox dilinə çevrilmiş, Azərbaycan, türk, rus, fransız, yapon, qazax, rumın, alban, macar dillərində qırxdan çox kitabı yayınlanan Türk dünyasının ünlü şairi Məmməd İsmayılın adına Türkiyədə kitab ərməğan olunub. “Prof. Dr. Mehmet İsmail Armağanı” adlı kitabda şair, yazıçı, və elm adamlarının Məmməd İsmayıla həsr olunmuş şeirləri, xatirə yazıları və elmi məqalələr yer alıb. Bu kitab, əsərləri nəinki XX əsr Azərbaycan poeziyasının, eləcə də Türk dünyasının nadir incilərindən sayılan Məmməd İsmayıla ərmağandır. Onun poeziyası milli ruhu daşıyan, türklük düşüncəsini məfkurə bilən insanlara daha çox doğmadır. Poetik irsi xüsusi özəlliyə malik olan şair Azərbaycan intellektual ədəbiyyatının yaradıcılarından biridir. Şairin poeziyası xəlqi mahiyyət daşısa da, daha çox milli ziyalı çevrəsinə ünvanlanıb. Çünki milləti millət edən onun qabaqcıl ziyalıları, fikir və düşüncə insanlarıdır. Şəxsiyyəti və yaradıcılığı, özü və sözü bir olan Məmməd İsmayıl ədəbiyyata gəldiyi ilk gündən bu günə qədər qədər bu bütövlüyü və harmoniyanı qoruyub, özünü də, sözünü də millətin könül dünyasında qazandığı böyük sevgi və sayğı ilə yaradıcılığının ilk dövründən təsdiqləyib. Məmməd İsmayılın sözü xalq ruhunun çırpıntısını, ürək döyüntüsünü öz ritmində və intonasiyasında ifadə edən ən mükəmməl nümunələr kimi seçilir.
Kitabda AMEA Folklor İnstitutunun əməkdaşları- fil.ü.f.d., dos. Atif İslamzadənin "Dede Korkut Kitabında Bir Mekan İşareti Olarak Türküstan", fil.ü.f.d.,dos. Aynur Aydın qızı - İbrahimovanın "Məmməd İsmayıl şeirinin folklor qaynaqları", fil.ü.f.d.,dos. İlhamә Qəsəbovanın "Məmməd İsmayıl yaradıcılığı funksional üslub sistemində" və fil.ü.f.d.
Xәyalә Orucqızı - Ağayevanın "Məmməd İsmayıl yaradıcılığında Vətən mövzusu" başlıqlı məqalələri də yer alıb.