Azərbaycan radiosunun “Dünya bir nağıldı” verilişində Cəlilabad folkloru haqqında danışılıb
İyulun 14-də Azərbaycan radiosunda efirə gedən “Dünya bir nağıldı” verilişi Cəlilabad folklor örnəklərinə həsr olunub. Verilişin qonağı - AMEA Folklor İnstitutunun aparıcı elmi işçisi, filologiya üzrə fəlsəfə doktoru, dosent Elçin Qaliboğlu AMEA Folklor İnstitutu tərəfindən nəşr edilmiş - bölgədən toplanmış iki kitab (“Muğan folkloru” - 17-ci kitab, Alarların arasından toplanmış folklor örnəkləri, Bakı, 2008, toplayanı Bilal Hüseynov (Alarlı) və “Cəlilabad folklor örnəkləri” – toplayanlar – Sahibə Sədnikqızı, İlkin Elsevər, 2020) haqqında ətraflı bilgi verib, nəşrlərdəki müxtəlif janrları əhatə edən örnəklərdən danışıb. Vurğulanıb ki, Azərbaycan folklorunun zənginliyinin sübutu kimi variantlılığa təbii olaraq bu nəşrlərdə də rast gəlinir. Materialların toplanma arealının təhlili, toplayıcıların təəssüratları bu qənaətə gəlməyə imkan verir ki, folklor materiallarının bundan sonra da toplanılıb nəşr edilməsi, tədqiqi qarşıda duran əsas xəlqi-mənəvi işlərdən olacaq.
Verilişdə tanınmış diktor, xalq artisti Eldost Bayramın ifasında bölgədən toplanmış folklor örnəkləri səsləndirilib. |