Elçin Qaliboğlu “Şuşa ili”nə həsr edilən V Beynəlxalq “Həmzə Nigari” Simpoziumunda çıxış edib

17-19 may 2022-ci il tarixlərində Ağdam rayonunun Quzanlı qəsəbəsində “Miras” Mədəni İrsin Öyrənilməsinə Kömək İctimai Birliyi, Azərbaycan Dövlət Mədəniyyət və İncəsənət Universiteti, Türkiyənin Amasiya Universiteti və Ağdam Rayon İcra Hakimiyyətinin təşkilatçılığı ilə “Şuşa ili”nə həsr edilən V Beynəlxalq “Həmzə Nigari” Simpoziumu keçirilib. Simpoziumda AMEA Folklor İnstitutunun aparıcı elmi işçisi, filologiya üzrə fəlsəfə doktoru Elçin Qaliboğlu onlayn formatda “Ədəbiyyatın əbədiyyət borcu və qayğısı” adlı məruzə ilə çıxış edib. Vurğulanıb ki, minillərdir əsil ədəbiyyat insanın həyata, dünyaya, təbiətə, özünə münasibətini ifadə edir. Ədəbi əsərin yaşarılığı həm də yaradıcının ruhunun nə dərəcədə güclü olması ilə bağlıdır. Zəif özünüifadənin məhsulu zamanı ötə bilmədiyindən gerçəkliyə bağlı qalır, sabaha yol ala bilmir. Ədəbi əsərin əbədi olması həm də yaradıcının ləyaqətli ömür yaradıcılığı ilə bağlıdır. Əslində tarix boyunca sevilən ədəbi əsərlər yaradıcısının az ya çox dərəcədə zamanı ötməsi ilə bağlıdır. Yüksək ölçülü yaradıcı peşəkarlığı yaradıcı ömrünü mahiyyətcə təsdiq edir. Ədəbiyyatın heç zaman vaz keçilməyən insani missiyası var. Ədəbiyyatın başlıca qayğısı mahiyyətcə insanı özümlüyünə - ilahi, insani imkanlarına yetirmək olmalıdır. Ədəbiyyatın h’r zaman əbədiyyətə layiq olmaq, onu təsdiq etmək imkanı və borcu var. Məqalədə ədəbiyyatın insani missiyası, ədəbiyyat və zaman, ədəbiyyatın əbədiyyət borcu və qayğısı, ədəbiyyatın mənəvi problemləri, yazıçının özüylə üz-üzə qalmasının gərəkliyi kimi məsələlər təhlil edilib.