Qazaxıstanlı alim Folklor İnstitutunda olub
19 aprel 2022-ci il tarixində Orta Asiya İnnovasiya Universitetinin müəllimi Dr.Arzu Qurbanova AMEA Folklor İnstitutunun qonağı olub. İnstitutun baş direktoru, akademik Muxtar Kazımoğlu-İmanov qonağı səmimi qarşılayaraq onu institutda görməkdən məmnun olduğunu bildirib, müəssisədə görülən işlər barədə məlumat verib. Şuşada keçiriləcək Dünya Azərbaycanlılarının V Qurultayı çərçivəsində Folklor İnstitutunu ziyarət edən qonaq gəlişinin əsas məqsədinin Azərbaycandakı elmi qurumlarla tanışlıq, eləcə də qarşılıqlı əlaqələrin qurulması olduğunu qeyd edib və çalışdığı ali təhsil ocağı barədə bilgi verib.
Akademik Muxtar Kazımoğlu-İmanov da söhbət zamanı rəhbərlik etdiyi institutun Orta Asiya respublikaları və Qazaxıstanın elm və təhsil müəssisələri ilə əlaqələrindən geniş bəhs edib. Görüşdə Orta Asiya İnnovasiya Universiteti ilə AMEA Folklor İnstitutu arasında qarşılıqlı əməkdaşlıq müqaviləsinin imzalanması qərara alınıb. Görüşdə Folklor İnstitutunun elmi katibi fil.ü.f.d.,dos.Elçin Abbasov və Folklor və yazılı ədəbiyyat şöbəsinin əməkdaşı, fil.ü.f.d.Əpoş Vəliyev də iştirak ediblər.
Görüşdən sonra Dr.Arzu Qurbanova institutda fəaliyyət göstərən şöbələrlə də tanışlıq imkanını əldə edib. |