07 dekabr 2021- ci il tarixində Türkiyənin İqtisadi İnkişaf və Sosial Araşdırmalar İnstitutunun (İKSAD) rəhbəri Prof.Mustafa Lətif Əmək və İKSAD-ın yayım qrupu başqanı Səfa Salih Bildirici AMEA Folklor İnstitutunda qonaq olublar. Folklor İnstitutunun direktoru, akademik Muxtar Kazımoğlu-İmanov qonaqları səmimi qarşılayıb, İKSAD ilə Folklor İnstitutunun birgə təşkil etdiyi konfransların əhəmiyyətinə diqqət çəkib və gələcək perspektivlərdən söhbət açıb. Azərbaycanla yaxın elmi münasibətlərinin olduğunu bildirən prof. M.L.Əmək İKSAD-ın hazırda 43 ölkədə elmi araşdırma fəaliyyəti apardığını qeyd edib. O, son iki ildə karonavirus pandemiyası səbəbindən canlı tədbirlərin təxirə salındığını təəssüf hissi ilə bildirib. Bakıya ziyarətinin ilk günü Folklor İnstitutunda olan qonaq dörd gün ərzində 12 universitetdə olacağını vurğulayıb. Bu müddət ərzində İKSAD-ın 80-ə yaxın elmi görüşlər keçirtdiyini bildirən prof.M.L.Əmək yeni yaratmış olduqları Science Azerbaijan platformasının rəsmi tanıtımını keçirəcəklərini də diqqətə çatdırıb. O, əsas məqsədlərinin bu platforma vasitəsilə ölkəmizin müxtəlif bölgələrində konfranslar təşkil etmək, elmi araşdırma proyektləri həyata keçirtmək və Azərbaycanı dünyanın elm mərkəzinə çevirmək olduğunu vurğulayıb. Prof. Mustafa Lətif Əmək söhbət zamanı bildirib ki, biz elmi qurumların istər sosial elmlər, istər müxtəlif fənlərlə bağlı müxtəlif proyektlər icra etmək istədikləri vaxt ilk olaraq məhz Science Azerbaijan platformasına müraciət etmələrini istəyirik.
Görüşdə AMEA Folklor İnstitutunun Dədə Qorqud şöbəsinin müdiri, fil.e.d.Ramazan Qafarlı, Xarici Əlaqələr bölməsinin müdiri Əli Şamil, institutun İctimaiyyətlə əlaqələr üzrə məsul şəxsi, fil.ü.f.d., dos.Sönməz Abbaslı və Azərbaycan Pedaqoji Universitetinin əməkdaşı, İKSAD-ın Azərbaycan üzrə koordinatoru Əlvan Cəfərli də iştirak ediblər.