Bu günlərdə Türkiyənin İstanbul şəhərində Azərbaycanın Zəfər günü və ustad şair Məhəmməd Füzuli poeziyası ilə bağlı konsert təşkil olunub. İstanbul Böyükşəhər Bələdiyyəsinin dəstəyi ilə təşkil olunmuş konsertə AMEA Folklor İnstitutunun “Qorqud” folklor ansamblının bədii rəhbəri, Respublikanın əməkdar artisti Nuriyyə Hüseynova və İranın Təbriz şəhərindən muğam müsabiqəsinin qalibi Nasir Atapur qatılıblar. İfaçılar həm Füzuli kantatasını, həm də Bayatı-Şiraz muğam dəstgahını ifa ediblər. Tamaşaçı alqışlarından sonra “Bir çoban qızı” adlı xalq mahnısı da ifa edilib.

Tədbir İstanbulun ən böyük konsert salonlarından biri olan Camal Rəşid Rey salonunda Türkiyə orkestrinin ⸺ həm qərb musiqi alətləri, həm də şərq milli musiqi alətlərinin birgə müşayiəti ilə baş tutub. Qeyd edək ki, Türkiyə orkestri bir neçə ay öncə Bayatı-Şiraz muğam dəstgahının rənglərini və təsniflərini nota alıb. Tədbirin sonunda tamaşaçılar, eləcə də İstanbulda yaşayan soydaşlarımız ifaçılara böyük sevgi və səmimiyyət nümayiş etdiriblər. Tədbirin keçirilməsində böyük əmək sərf edən Türkiyədə Azərbaycan musiqisinin, xüsusən tar sənətinin geniş təbliğatını aparan TRT-nin sənətçisi, mahir tar ifaçısı Nevcivan Özel bu cür konsertlərin ölkənin digər şəhərlərində də keçirmək niyyətində olduğunu qeyd edib. Muğam ifaçıcı N.Hüseynova isə gələcəkdə eyni dilə, dinə və mədəniyyətə sahib olan “bir millət, iki dövlət”in növbəti tədbirlərinin Azərbaycanda, xüsusən Qarabağda, işğaldan azad olunmuş torpaqlarda keçirilməsi fikrini irəli sürüb.