Əməkdaşımız Azərbaycan radiosu ilə TRT 1 – “Türkiyənin səsi” radiosunun birgə layihəsi olan “Durna teli” verilişində atalar sözlərinin gənc nəslin tərbiyəsindəki rolundan danışıb
Avqustun 13-də AMEA Folklor İnstitutunun böyük elmi işçisi, fil.ü.f.d. Elçin Qaliboğlu Azərbaycan radiosu ilə Türkiyənin TRT 1 – “Türkiyənin səsi” radiosunun birgə layihəsi olan “Durna teli” verilişinin canlı yayımda qonağı olub.
Türk Dünyasına yayımlanan bir saatlıq ortaq yayında öncəki ilk yarım saatda “Türkiyənin səsi” radiosundan Yasəmən xanımın aparıcılığı ilə Hacəttəpə Universitetinin “Türk xalq bilimi” bölümünün professoru, dr. Özkul Çobanoğlu türk xalqları arasında yayğın olan ortaq atalar sözləri haqqında qənaətlərini bölüşüb, örnəkləri təqdim edib.
Canlı yayımın ikinci yarım saatında aparıcı Dilşad Tahirqızı ilə söhbətində fil.ü.f.d. Elçin Qaliboğlu atalar sözlərinin uşaq və yeniyetmələrin, eləcə də gənclərin tərbiyəsindəki əvəzsiz rolundan danışıb.
Verilişdə uşaq, yeniyetmə və gənclərin tərbiyəsinə yönəlik atalar sözləri təqdim və təhlil edilib. Bildirilib ki, yeni, gənc nəslin nümayəndələrinin ailədə, məktəbdə uyğun nümunələrlə anlaşılan səviyyədə tanışlığı onların ağlında, düşüncəsində ciddi rol oynayır.
E.Qaliboğlu bu gün hər bir ailədə folklor mühitinin yaşadılmasının gərəkliyini bildirib, vurğulayıb ki, orta nəslin baba-nənəsindən, doğmalarından eşitdiyi örnəklərin ailədə yaradıcı şəkildə gələcək nəslə ötürülməsi mənəvi borc sayılmalıdır. O, uşaqlıq dönəmində nənəsindən, ata-anasından eşitdiyi folklor örnəklərinin ruh yaddaşında ciddi iz qoyduğunu qeyd edib.
Verilişdə “Dədə Qorqud dastanları”ndakı ata sözləri haqqında danışılıb, örnəklər təqdim olunub.
Xatırladaq ki, Azərbaycan radiosu ilə yayımlanan verilişi araya-ərsəyə gətirənlər Əhməd Oğuz, Dilşad Tahirqızı, Rövşən Sabiroğlu, Gülsüm Dadaşovadır. |