07-09 may 2021-ci il tarixlərində Beynəlxalq Yunus Əmrə və Dünya Dili Türkcə Elm Şöləni keçirilib. Zoom platforması üzərindən onlayn formatda keçirilən tədbirə AMEA Folklor İnstitutunun Dədə Qorqud şöbəsinin əməkdaşı, fil.ü f.d., dos. Nigar Həsənova da qatılıb. O, "Yunus Əmrənin dil sənətkarlığı" mövzusunda çıxış edərək, Yunus Əmrənin poeziya dilinin türkcənin inkişafı istiqamətində böyük rola malik olduğunu, onun poeziyasının zəngin bədii dil xüsusiyyətləri ilə seçildiyini və yaradıcılığında dilin bütün poetik imkanlarının əksini tapdığını vurğulayıb. N.Həsənova məruzəsində Yunus Əmrə yaradıcılığında dil məsələlərinə, deyimlər və atalar sözlərinin işlənməsinə diqqət çəkib, onun şeirlərində istifadə edilən maraqlı dil faktlarından örnəklər verib. Məruzəçi qeyd edib ki, Yunus Əmrə yaradıcılığındakı "Yüz çuqalu gəlürsə, yalıncağı soyamaz", "Kim kimə quyu qaza, kəndü düşə", "Tağ nə qədər yüksək isə yol anun üstindən aşar", "Arifə bir söz yetər" kimi atalar sözləri xalq hikmətindən yoğrulub gələn ifadələrlə zəngindir.